جۇمىسشىلاردىڭ جالاقىسى قانشالىقتى ءوستى

استانا. KAZINFORM – ق ر ەڭبەك جانە حالىقتى الەۋمەتتىك قورعاۋ ءمينيسترى كەلەر جىلى «جۇمىسشى ماماندىقتارى جىلى» اياسىندا جۇمىسشىلاردىڭ جالاقىسىن كوتەرۋ مۇمكىندىگىنە قاتىستى تۇسىنىك بەردى.

«مەملەكەت باسشىسى ءوزىنىڭ قازاقستان حالقىنا كەزەكتى جولداۋىندا 2025-جىلدى جۇمىسشى ماماندىقتارى جىلى دەپ جاريالاۋدى جانە ولاردىڭ مارتەبەسىن كوتەرۋدى ۇسىندى. ەڭ الدىمەن، سۋ، ەنەرگەتيكا، قۇرىلىس جانە باسقا دا سالالاردا قاتتى بايقالىپ وتىرعان كادر تاپشىلىعىن جويۋ قاجەت ەكەنىن اتاپ ءوتتى. ەڭبەك زاڭناماسىنا سايكەس، ەڭبەك مينيسترلىگى مەملەكەتتىك بيۋجەت قاراجاتى ەسەبىنەن ۇستالاتىن ۇيىمدارداعى قىزمەتكەرلەردىڭ ەڭبەكاقىسىن رەتتەيدى. ق ر پرەزيدەنتىنىڭ تاپسىرماسىنا وراي 2022-جىلدان باستاپ بيۋجەت سالاسى قىزمەتكەرلەرىنىڭ جەكەلەگەن ساناتتارىنىڭ، ونىڭ ىشىندە جۇمىسشى ماماندىقتاردىڭ جالاقىسى جىلىنا ورتا ەسەپپەن 20 پايىزعا كەزەڭ-كەزەڭىمەن كوتەرىلىپ كەلەدى. ناتيجەسىندە 2025-جىلعا قاراي ولاردىڭ جالاقىسى 2 ەسەگە ارتادى»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ال جەكە كاسىپورىندارداعى جۇمىسشىلاردىڭ جالاقىسى ەڭبەك ءارى ۇجىمدىق شارتتار اياسىندا عانا ايقىندالادى.

«ءوز كەزەگىندە جەكەمەنشىك نىسانىنداعى ۇيىمدار قىزمەتكەرلەرىنىڭ جالاقىسىنىڭ مولشەرى ەڭبەك، ۇجىمدىق شارتتارمەن بەلگىلەنەدى جانە ول جۇمىسكەردىڭ بىلىمىنە، ورىندالاتىن جۇمىستىڭ كۇردەلىلىگى مەن ساپاسىنا قاراي بەلگىلەنەدى»، - دەپ اتالىپ وتكەن ۆەدومستۆو اقپاراتىندا.

ايتا كەتەيىك، مەملەكەت باسشىسى قاسىم-جومارت توقايەۆ ءوز جولداۋىندا 2025-جىلدى «جۇمىسشى ماماندىقتارى جىلى» دەپ جاريالادى.