جۇمىسشى ماماندىقتار: 18 جاستاعى استانالىق ايىنا جارتى ميلليون تەڭگە تابادى
استانا. KAZINFORM - بۇگىندە كاسىپتىك ءبىلىم الىپ، ەڭبەك نارىعىنا ەرتە ارالاسقان جاستاردىڭ سانى ارتىپ كەلەدى. ولاردىڭ ءبىرى - استانا قالاسىنداعى كاسىپتىك تەحنيكالىق كوللەدجدىڭ بيىلعى تۇلەگى كيريلل ساۆەليەۆ.
جاس مامان جۋىردا عانا ديپلوم الىپ ۇلگەرسە دە، قازىردىڭ وزىندە ەلورداداعى تانىمال اسحانالاردىڭ بىرىندە شەف-كونديتەر بولىپ جۇمىس ىستەيدى.
بار بولعانى ون سەگىز جاسقا تولعان كيريلل قازىردىڭ وزىندە ءتاتتى تاعامدار دايىنداۋدا تۇتىنۋشىلاردىڭ سۇيىكتى مامانىنا اينالعان. ول ءارتۇرلى زاماناۋي دەسەرتتەردى، كونديتەرلىك ونىمدەردى ءوز قولىمەن دايىنداپ، ەرەكشە دامىمەن ەرەكشەلەنىپ ءجۇر. ايىنا جارتى ميلليون تەڭگە كولەمىندە جالاقى الىپ وتىرعان جاس مامان - ەڭبەكقورلىقتىڭ، كاسىبي شەبەرلىكتىڭ جانە دۇرىس باعىتتاعى ماماندىق تاڭداۋدىڭ ناقتى ۇلگىسى.
كيريللدىڭ بۇل سالاعا دەگەن قىزىعۋشىلىعى بالا كۇنىنەن باستاۋ العان. ۇيدە ۇلكەن اپكەسىنىڭ ۇنەمى تاتتىلەر ءپىسىرىپ جۇرگەنىن كورىپ وسكەن ول، ەرتە جاستان-اق اسپازدىققا قىزىعۋشىلىق تانىتىپ، 16 جاسىنان باستاپ ەڭبەككە ارالاسقان. قازاق ءتىلىن جەتىك مەڭگەرگەن جىگىت - كوپۇلتتى قوعامىمىزداعى تاتۋ ءومىر مەن مادەني ۇيلەسىمدىلىكتىڭ دالەلى.
جاس ماماننىڭ جەتىستىگىنە ەرەكشە قۋانىپ جۇرگەن جانداردىڭ ءبىرى - كوللەدجدەگى العاشقى كۋراتورى. كيريلل قازىر ءدال سول ۇستازىمەن بىرگە ءبىر مەكەمەدە ەڭبەك ەتىپ ءجۇر. بۇل - ۇستاز ەڭبەگىنىڭ جەمىسى مەن شاكىرت پەن ۇستاز اراسىنداعى ۇزىلمەيتىن بايلانىستىڭ كورىنىسى.
كيريلل الداعى ۋاقىتتا جوعارى وقۋ ورنىنا ءتۇسىپ، كاسىبي دەڭگەيىن ودان ءارى دامىتۋدى كوزدەپ وتىر. شەتەلگە شىعىپ، الەمدىك دەڭگەيدەگى كونديتەرلىك مەكتەپتەردە تاجىريبە الماسۋدى ماقسات ەتكەن ول - قازاق جاستارىنىڭ ءبىلىم مەن كاسىپتى قاتار يگەرىپ، ەڭبەك نارىعىنا ەركىن بەيىمدەلە الاتىنىن دالەلدەگەن جاس مامان.
كوللەدجدەگى ۇستازدارى كيريللدىڭ كاسىبي جانە ادامگەرشىلىك قاسيەتتەرىن ەرەكشە اتاپ وتەدى.
«جاس مامان رەتىندە ءوز ىسىنە ادال، شەبەرلىگى جىلدان- جىلعا ارتىپ كەلەدى. ءبىز ءۇشىن كيريلل - ۇلگىلى تۇلەك»، - دەيدى ۇستازدارى.