جەمىس-جيدەكتى قىستا قانتسىز ساقتاۋدىڭ ون ءتاسىلى

استانا. قازاقپارات - جەمىس-جيدەكتى قىسقا ساقتاۋ ءۇشىن تۇرعىندار قانت قوسىلعان توساپ، قايناتپا جاسايتىن. قازىر قانتتىڭ قىمباتتاۋى مەن تاپشىلىعىنان جانە ونىڭ دەنساۋلىققا زيانىنان ادامدار باسقا بالاما تاسىلدەردى قولدانۋعا كوشتى.

جەمىس-جيدەكتى تومەندەگى جولدارمەن قانتسىز ساقتاۋعا بولادى:

1. ماۋسىمدىق جەمىس-جيدەكتەردى بلەندەرمەن ەزىپ، ارنايى پاكەتكە سالىپ، مۇزداتقىشتا قاتىرىپ الۋ كەرەك. كەيىن قانت ارزانداعاندا ءجىبىتىپ، قايناتىپ الاسىز. قىستا قانتسىز-اق، شايعا قوسۋعا، كونديتەرلىك ونىمدەرگە سالما رەتىندە پايدالانۋعا بولادى.

2. جەمىس-جيدەكتەردەن بال قوسىلعان توساپ جاساپ الىڭىز. بالدىڭ تاتتىلىگى مەن كونسيستەنسياسى جوعارى بولعاندىقتان كوپ مولشەردە قوسۋدىڭ قاجەتى جوق.

3. ليمون قوسىلعان قايناتپا جاساۋعا بولادى. العاش ەستىگەندە كوپ ادام ليمون اشى، قىشقىل عوي، قالاي توساپ قايناتۋعا بولادى دەپ تاڭدانادى. جەكە تاجىريبەمدە ءبىر شاي قاسىق ليمون سۋىن قوسىپ، جەمىس-جيدەكتى بىرنەشە رەت قايناتىپ، پايدالى ءارى ءتاتتى توساپ جاساعانمىن.

4. سيترۋس جەمىستەردەن يممۋنيتەتكە پايدالى قوسپا جاساۋعا كەڭەس بەرەمىن. اپەلسين، ليمون، ءزىمبىردى ەزىپ، سۋمەن ارالاستىرىپ، قايناتىپ، قىسقا ساقتاۋعا بولادى. مۇنى تۇماۋراتقاندا ءدارى رەتىندە قولدانۋعا بولادى.

5. قۇلپىناي، تاڭقۋراي سياقتى ءتاتتى جەمىستەردى قانت قوسپاي-اق، قايناتىپ، بانكادا ساقتاي بەرىڭىز. ال الما، شيە سياقتى قىشقىل ءدامى بار جەمىستەردى ءتاتتى جەمىستەرمەن ارالاستىرىپ قايناتساڭىز، قانتتىڭ قاجەتى دە جوق. باناننىڭ قۇرامىندا گليۋكوزا بولعاندىقتان جەكە ءوزىن قايناتىپ توساپ جاساۋعا نەمەسە باسقا جەمىستەرگە ءتاتتى ءدام بەرۋ ءۇشىن قوسۋعا بولادى.

6. جەمىس-جيدەكتى تەك توساپ رەتىندە ەمەس، قۇرعاتىپ تا ساقتاۋعا بولادى. الما، ورىكتى تازالاپ، كەپتىرىپ قاق جاساپ، قىستا كومپوت قايناتۋعا بولادى.

7. ۇيدەگىلەر كومپوتتى ۇناتپاسا، جەمىس-جيدەكتەردى كەپتىرىپ، قىتىرلاق چيپسى دايىنداۋعا بولادى. بۇل، اسىرەسە، بالالاردىڭ سۇيىكتى اسى. كەپتىرىلگەن جەمىستەردى اس ۇيدە دەكور رەتىندە قولدانۋ دا جاقسى يدەيا. اس بولمەگە ءيىس پەن كورىك بەرىپ تۇرادى.

8. جەمىس-جيدەكتى قانتسىز قايناتىپ، بەلگىلى ءبىر فورماعا كەلتىرىپ كەپتىرۋگە بولادى. مۇنى «پاستيلا» دەپ اتايدى. بۇل دا شىعىنسىز، زيانسىز جانە بالالارعا بەرۋگە ىڭعايلى.

9. ەگەر سالقىن سۋسىندى جاقسى كورەتىندەر بولسا، مۇز تۇيىرشىكتەرىن جاساۋعا بولادى. مۇز قاتىراتىن ىدىسقا بالعىن جەمىستەردى سالىپ، ۇستىنە سۋ قۇيىپ، مۇزداتقىشقا قاتىرىپ قويىڭىز. كەيىن سۋسىن دايىنداعاندا وسى مۇز تۇيىرشىكتەرىن پايدالانۋعا بولادى.

10. كومپوت پەن مورس دايىنداۋ دا اسا قيىن ەمەس. جەمىس-جيدەكتىڭ كومپوتىن بانكاعا جاۋىپ، قىسقا ساقتاڭىز. كەپكەن قاقتان جاسالعان كومپوتقا قاراعاندا ءدامى مەن ءيىسى ساقتالادى.