جۇمىس بەرۋشى ارىز جازۋعا ماجبۇرلەسە - زاڭ نە دەيدى

پەتروپاۆل. KAZINFORM - جۇمىس بەرۋشىلەر تاراپىنان قىزمەتكەرلەرگە قىسىم كورسەتۋ، ولاردى «ءوز ەركىمەن» جۇمىستان كەتۋگە ماجبۇرلەۋ سەكىلدى زاڭسىز ارەكەتتەر بولىپ تۇرادى. مۇنداي جاعدايدا كوپشىلىك ءوز قۇقىعىن بىلمەگەندىكتەن، امالسىز كونۋگە ءماجبۇر.

سولتۇستىك قازاقستان وبلىستىق ادۆوكاتتار القاسىنىڭ مۇشەسى ولگا گاۆريك جۇمىستان زاڭسىز شىعارعان جاعدايدا قالاي ارەكەت ەتىپ، قايدا جۇگىنۋ كەرەكتىگىن، قۇقىعىڭىزدى قالاي قورعاۋعا بولاتىنىن ايتىپ بەردى.

ادۆوكاتتىڭ ايتۋىنشا، «ءوز ەركىمەن» جۇمىستان كەتۋگە ماجبۇرلەۋ - زاڭسىز. قازاقستان رەسپۋبليكاسىنىڭ كونستيتۋتسياسىنا جانە ەڭبەك كودەكسىنە سايكەس، ءار ازاماتتىڭ ەڭبەك ەتۋ قۇقىعى بار، ال ونى شەكتەۋ - زاڭبۇزۋشىلىق.

مۇنداي جاعدايدا نە ىستەۋ كەرەك؟

ەڭ الدىمەن:

- ءماجبۇرلى ارىز جازۋدان باس تارتىڭىز. ارىز تەك ءوز ەركىڭىزبەن جازىلۋى ءتيىس؛

- ەڭبەك ينسپەكسياسىنا جازباشا تۇردە شاعىم ءتۇسىرىڭىز؛

قۇقىقتارىڭىزدى قورعاۋ ءۇشىن دالەلدەر جيناڭىز:

- ەڭبەك شارتى كەرەك (جوق بولسا - جازباشا تۇردە تالاپ ەتىڭىز)؛

- جۇمىسقا قابىلداۋ تۋرالى بۇيرىق؛

- جۇمىس ۋاقىتى ەسەبىنىڭ تابەلى؛

- جۇمىس بەرۋشىمەن بولعان اڭگىمەلەردى جازىپ الىڭىز (بۇل جايلى ەسكەرتۋ جاساۋىڭىز قاجەت).

اركىم ءبىلۋى قاجەت ەڭبەك قۇقىعى بويىنشا ماڭىزدى نورمالار:

- ق ر كونستيتۋتسياسىنىڭ 24-بابىنىڭ 1-تارماعى: «اركىمنىڭ ەڭبەك ەتۋ ەركىندىگىنە، قىزمەت پەن كاسىپ ءتۇرىن ەركىن تاڭداۋعا قۇقىعى بار».

- ق ر ەڭبەك كودەكسى (56-باپ): جۇمىسشى جۇمىستان شىعاتىنى تۋرالى ءبىر اي بۇرىن ەسكەرتىپ، ەڭبەك شارتىن ءوز ەركىمەن بۇزا الادى.

ەگەر جۇمىس بەرۋشى ەڭبەك شارتىنداعى تالاپتاردى (مىسالى، دەمالىس بەرمەۋ، جۇمىس ورنىن دايىنداماۋ جانە ت. ب.) بۇزسا، جۇمىسشى ەڭبەك شارتى تالاپتارىنىڭ ورىندالماعانىن ەسكەرتۋى ءتيىس. ەگەر 7 جۇمىس كۇنى ىشىندە ەشقانداي شارا قولدانىلماسا، جۇمىسشى 3 جۇمىس كۇن بۇرىن ەسكەرتىپ، شارتتى بۇزا الادى.

الايدا، ءوز شەشىمىڭىزدى وزگەرتۋگە قۇقىعىڭىز بار ەكەنىن ۇمىتپاڭىز. ەڭبەك كودەكسى قىزمەتكەرگە ءوز ەركىمەن جازعان ارىزىن قايتارىپ الۋعا مۇمكىندىك بەرەدى.

ەگەر زاڭسىز جۇمىستان بوساتسا نە ىستەۋ كەرەك؟

كەلىستىرۋ كوميسسياسىنا جازباشا ارىز بەرىڭىز. ەگەر كوميسسيا شەشىمى ورىندالماسا نەمەسە ماسەلە شەشىلمەسە - سوتقا جۇگىنىڭىز.

سوتتا جۇمىستان زاڭسىز بوساتىلعانىڭىزدى راستاپ، جۇمىسقا قايتا قابىلداۋ، ءماجبۇرلى دەمالىس كەزەڭىندەگى جالاقىنى جانە مورالدىق زياندى وتەۋ تۋرالى تالاپ قويۋعا بولادى.

2016 -جىلدان باستاپ كۇشىنە ەنگەن جاڭا ەڭبەك كودەكسى بويىنشا:

- سوتقا جۇگىنۋدەن بۇرىن مىندەتتى تۇردە كەلىستىرۋ كوميسسياسىنا شاعىمدانۋ قاجەت (شاعىن كاسىپكەرلىك سۋبەكتىلەرى مەن زاڭدى تۇلعا، اتقارۋشى ورگانداردىڭ باسشىلارىنان باسقالار) .

كوميسسيا 15 جۇمىس كۇنى ىشىندە شەشىم شىعارىپ، 3 كۇن ىشىندە تاراپتارعا شەشىمنىڭ كوشىرمەسىن بەرۋى ءتيىس.

سوتقا جۇگىنۋ مەرزىمدەرى:

جۇمىسقا قايتا قابىلداۋ تۋرالى داۋلار بويىنشا:

كەلىستىرۋ كوميسسياسىنا - 1 اي ىشىندە؛

سوتقا - كوميسسيا شەشىمى بەرىلگەننەن كەيىن 2 اي ىشىندە.

باسقا ەڭبەك داۋلارى بويىنشا - 1 جىل ىشىندە.

ەسىڭىزدە بولسىن:

جۇمىس بەرۋشى زاڭسىز ارەكەت جاساپ، قىسىم كورسەتسە - قازاقستان زاڭدارى ءسىزدىڭ قۇقىعىڭىزدى قورعايدى. ەڭ باستىسى - دەر كەزىندە ارەكەت ەتۋ جانە زاڭ اياسىندا دالەلدەرى بار تالاپ قويۋ.

بۇعان دەيىن قازاقستاندىقتاردىڭ دەربەس دەرەكتەردى ۇرلاتۋدا ەڭ ءجيى جىبەرەتىن قاتەلىكتەرى تۋرالى جازعان ەدىك.

سونداي-اق، ونلاين-الاياقتىق قۇربانىنا اينالعان جاعدايدا قالاي ارەكەت ەتۋ قاجەتتىگى تۋرالى ماماننىڭ كەڭەسىن بەرگەن ەدىك.

اۆتور

اقەركە داۋرەنبەك قىزى