جەمقورلىققا قارسى كۇرەستى ءتيىمدى جۇرگىزۋ ءۇشىن جاڭا تاسىلدەر قاجەت - توقايەۆ
استانا. KAZINFORM - مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە سىبايلاس جەمقورلىقپەن كۇرەس ماسەلەسىن قوزعادى.
- جەمقورلىققا قارسى كۇرەسۋ ءۇشىن ناقتى، جۇيەلى شارالار قابىلدانىپ جاتىر. مەنىڭ تاپسىرماممەن سوت ارقىلى جەمقورلاردان الىنعان قاراجات مەكتەپتەر سالۋعا جۇمسالۋدا. ءۇش جىلدىڭ ىشىندە 89 مەكتەپتىڭ قۇرىلىسىنا 150 ميلليارد تەڭگەدەن استام قاراجات بەرىلدى (سونىڭ ىشىندە 61 مەكتەپ پايدالانۋعا بەرىلدى).
دەگەنمەن قازىرگى ساياسي جانە الەۋمەتتىك-ەكونوميكالىق جاعدايدا جەمقورلىققا قارسى كۇرەستى ءتيىمدى جۇرگىزۋ ءۇشىن جاڭا تاسىلدەر قاجەت. ءبىز قوناقجايلىق يندۋسترياسىنىڭ الەۋەتىن ماقساتتى تۇردە نىعايتىپ، تۋريزمدى دامىتامىز جانە شەتەلدىك قوناقتارىمىزدىڭ قاۋىپسىزدىگىن قامتاماسىز ەتۋگە باسا ءمان بەرەمىز، - دەدى پرەزيدەنت.
ول بۇگىندە قازاقستانعا كەلگەن ءاربىر تۋريسكە اۋەجايدان قاۋىپسىزدىك جادىناماسىمەن بىرگە موبيلدى بايلانىس پەن بازالىق ينتەرنەت پاكەتى بار جاڭا سيم-كارتا بەرىلەتىنىن ەسكە سالدى.
- قازاقستاندى جايلى ءارى قاۋىپسىز مەملەكەت ەتۋ - بارىمىزگە ورتاق مىندەت. ءبىز ازاماتتاردىڭ قۇقىعى مەن بوستاندىعىن قورعاي ءبىلۋىمىز كەرەك. ەل ىشىندەگى تىنىشتىق پەن ءتارتىپتىڭ ساقتالۋىن قامتاماسىز ەتۋ اسا ماڭىزدى. بۇل - حالىقتىڭ ءال-اۋقاتى مەن ەلىمىزدىڭ تابىستى دامۋىنا تىكەلەي ىقپال ەتەتىن فاكتور. سوندىقتان ءبىز بۇكىل قۇقىق قورعاۋ جۇيەسىنىڭ الەۋەتىن ارتتىرۋىمىز قاجەت. وسىلايشا، قازاقستان ايماقتاعى قاۋىپسىزدىكتى قامتاماسىز ەتۋگە زور ۇلەس قوساتىن ەل رەتىندەگى مارتەبەسىن نىعايتا بەرمەك.
قۇقىق قورعاۋ ورگاندارى تۇبەگەيلى وزگەرىستەرگە دايىن بولۋعا ءتيىس. تۇيتكىلدىڭ ءبارىن جان-جاقتى ويلاستىرىپ، جوسپارلى تۇردە شەشۋ قاجەت. قۇزىرلى ورگانداردىڭ نەگىزگى ماقساتى - ناقتى ناتيجەگە قول جەتكىزۋ، - دەدى قاسىم-جومارت توقايەۆ.
ەسكە سالايىق، بۇعان دەيىن پرەزيدەنت مەملەكەتكە قىزمەت ەتۋ - ەڭ قۇرمەتتى ءارى اسا جاۋاپتى مىندەت ەكەنىن جەتكىزدى.