قازىر مۇنداي قۇقىقبۇزۋشىلىقتار ءۇشىن ايىپپۇل سالىنىپ، اكىمشىلىك قاماققا الۋ جازاسى قاراستىرىلعان. نازەركە التىنبەك ينستاگرام پاراقشاسىن بىرنەشە جىل بۇرىن بەلسەندى جۇرگىزىپ باستادى. كەيىنگى ايلاردا ونىڭ كونتەنتىن 2 ميلليونعا جۋىق ادام كوردى. «جەلىدە جاقسى قارالىم جينايتىن بلوگەر، جۇرت الدىنداعى جاۋاپكەرشىلىكتى جاقسى سەزىنەمىن»، - دەيدى.
نازەركە التىنبەك، بلوگەر:
- بالاعات ءسوز قولداناتىن بلوگەرلەر مەنىڭ الدىمدا وتە تومەن. سەبەبى بۇل ۇلكەن جاۋاپكەرشىلىكتى تالاپ ەتەدى. كەز كەلگەن جاستاعى ادامنىڭ قولىندا قازىر تەلەفون بار. ادەپسىز كونتەنت جاستاردىڭ سويلەۋ مانەرىنە تىكەلەي اسەر ەتەدى دەپ ويلايمىن. جاڭا اكىمشىلىك كودەكس جوباسىندا ەكى باپقا وزگەرىس ەنگىزۋ كوزدەلگەن.
ەندى ونلاين- پلاتفورمالارداعى جالا ءۇشىن 778500 تەڭگە ايىپپۇل نەمەسە 20 تاۋلىككە دەيىن قاماۋ قاراستىرىلادى. ال الەۋمەتتىك جەلىدە بالاعات ءسوز ايتۋ ۇساق بۇزاقىلىققا تەڭەستىرىلىپ، 86500 تەڭگە ايىپپۇلدان 15 تاۋلىككە دەيىن قاماۋ جازاسى ۇسىنىلىپ وتىر. «بۇل جاعداي ءبىر جىل ىشىندە قايتالانسا، جازا كۇشەيەدى»، - دەيدى ماماندار.
گريگوري گروموۆ، زاڭگەر:
- ءبىزدىڭ زاڭناماعا ەنگىزىلەتىن جاڭا تۇزەتۋلەر الەۋمەتتىك جەلىدەگى بالاعات ءسوزدى دە ۇساق بۇزاقىلىققا جاتقىزادى. ياعني بالاعات ءسوز ناقتى ءبىر ادامعا باعىتتالماسا دا، جاۋاپكەرشىلىككە اكەلۋى مۇمكىن. ال قورلاۋ فاكتىسىن دالەلدەۋ ءۇشىن سكرينشوت پەن بەينەجازبانى ساقتاپ، ءتيىستى تارتىپپەن تىركەۋ قاجەت. ونى ارنايى فيلولوگيالىق ساراپتاما انىقتايدى.
بۇل ماسەلەگە قاتىستى قوعام پىكىرى دە ءارتۇرلى. ءبىرى الەۋمەتتىك جەلىدە ءتارتىپ پەن مادەنيەتتى كۇشەيتۋ قاجەت دەسە، ەندى ءبىرى جازادان بۇرىن ادامداردىڭ ساناسى مەن سويلەۋ ادەبىن قالىپتاستىرۋ ماڭىزدى ەكەنىن ايتادى. جەلىدە جازىلعان پىكىر كەيىن وشىرىلسە دە، ونىڭ سكرينشوتى نەمەسە ەكران جازباسى دالەل بولا الادى. دەگەنمەن جاۋاپكەرشىلىككە تارتۋ ءۇشىن پىكىر اۆتورى مەن قۇقىق بۇزۋشىلىق فاكتىسى انىقتالۋى كەرەك. ال سىن ايتۋ مەن نارازىلىق بىلدىرۋگە زاڭمەن تىيىم سالىنبايدى.
24.kz