جەلىنى تاڭعالدىرعان تۇركىستاندىق گيد-كۇزەتشى اعىلشىن ءتىلىن ۇيالى تەلەفوننان ۇيرەنگەن
تۇركىستان. KAZINFORM - تۇركىستاندىق كۇزەتشىنىڭ اعىلشىندارمەن ەركىن سويلەسىپ جۇرگەن ۆيدەوسى الەۋمەتتىك جەلىدە كەڭىنەن تاراپ كەتتى. قوجا احمەت ياساۋي كەسەنەسىنە كەلگەن تۋريستەرگە ەكسپوناتتاردى اعىلشىن تىلىندە تانىستىرعان قاراپايىم ەڭبەك ادامىنىڭ بۇل ارەكەتى كوپشىلىكتىڭ تاڭدانىسىن تۋعىزدى.
گيد-كۇزەتشىنىڭ ەسىمى - شەر يلياسوۆ. ياساۋي كەسەنەسىندە كۇزەتشى بولىپ قىزمەت اتقارادى.
55 جاستاعى ازاماتتىڭ اعىلشىن ءتىلىن مەڭگەرە باستاعانىنا 5 جىلدىڭ ءجۇزى بولعان.
«بوس ۋاقىت كوپ بولا بەرمەيدى. تەك ۇيگە بارعاندا عانا ءتىل مەڭگەرۋگە نازار اۋدارامىن. ەشقانداي كۋرسقا جازىلىپ، ساباق الىپ جۇرگەن جوقپىن. تەك ءوز كۇشىممەن ۇيرەنىپ ءجۇرمىن. بىلگەنىمنەن بىلمەگەنىم كوپ. سوندىقتان ىزدەنۋدى توقتاتقان ەمەسپىن. قازىر اقپاراتتاردى دا اعىلشىن تىلىندە تىڭداپ ءجۇرمىن»، - دەيدى ول.
شەر تالعاتبەك ۇلى كۇندەلىكتى كەشكى استان سوڭ ءبىر ساعات ۋاقىتىن ءتىل ۇيرەنۋگە بولەدى. ۇيالى تەلەفون ارقىلى سوزدەر جاتتايدى دا، اۋديو ارقىلى ايتىلۋى مەن وقىلۋىن مەڭگەرەدى.
تۇسىنبەگەن تۇستارىن ۇل-قىزىنان سۇرايدى. «كىتاپپەن ۇيرەنۋ قولايسىز» - دەيدى جىگىت اعاسى.
«قازاقتا «جولاۋشى ءمۇساپىر» دەگەن ءسوز بار. كەسەنەگە كەلگەن تۋريستەر كوپشىلىكتەن كومەك سۇراپ، تۇسىندىرە الماي جاتقان كەزدەرىن كورسەم، بىردەن قاسىنا بارامىن. اجەتحانانىڭ قايدا ەكەنىن، سۋ ىشەتىن جانە تاماق ىشەتىن جەرلەردى سۇراپ جاتادى. بارشاسىنا كومەكتەسەمىن. بۇل مەن ءۇشىن ۇلكەن تاجىريبە»، - دەيدى ول.
شەر تالعاتبەك ۇلى جۇمىس بارىسىندا كۇندەلىكتى جاتتاعان سوزدەرىن قولدانىپ، شەتەلدىكتەرمەن سويلەسەدى. سۇراقتارىنا جاۋاپ بەرىپ، ءجون سىلتەيدى.
ءتىپتى، كەسەنە اۋماعىندا گيد قىزمەتىن دە اتقارىپ كەتە بەرەدى.
سەبەبى، مۇنداعى تاريحي ورىندار مەن جادىگەرلەردى كۇندەلىكتى كورىپ جۇرگەندىكتەن، بارشاسىنا قاتىستى اڭگىمەلەر مەن ءاپسانالاردى جاتتاپ العان.
«الەۋمەتتىك جەلىدە تاراعان ۆيدەوداعى ەكى ازامات قىتايدان كەلگەن ەكەن. كەسەنە ىشىندەگى تايقازان تۋرالى سۇرادى. تاريحىن ايتىپ، ءتۇسىندىرىپ بەردىم. ال، ۆيدەوعا تۇسىرگەن ادامنىڭ كىم ەكەنىن بىلمەيمىن. ارتىمىزدان كەلە جاتقاندارىڭ ءبىرى تەلەفونعا ءتۇسىرىپ، جەلىگە جۇكتەپ جىبەرىپتى»، - دەيدى شاكەڭ.
گيد-كۇزەتشى ەندىگى جەردە يسپان ءتىلىن ۇيرەنۋدى جوسپارلاپ ءجۇر.
اۆتور
قايرات زاينيشەۆ