جەلىدە مۇحتار ماعاۋيننىڭ تۇركياداعى ۆيدەوسى تارادى

جەلىدە جازۋشى مۇحتار ماعاۋيننىڭ تۇركيادا سۋدا ءجۇزىپ جۇرگەن ۆيدەوسى پايدا بولدى. بۇل تۋرالى جۋرناليست قورعانبەك امانجول Facebook-پاراقشاسىندا ءبولىستى.

«تۇركيادا، كەمەرگە كەلىپ جەتتى، قۋانىشتان جانعا شۋاق جاعايىن! جاقسى جاڭالىقتى سۇيىنشىلەگەن - قۋانىشبەك باۋىرىم. جەلىگە سالعان حاتشىسى قورعانبەك امانجول دەپ بىلىڭىزدەر... ەندى مۇحتار ماعاۋين اعاتايىم مۇحيتتىڭ ار جاعىندا ەمەس، «اسسالاۋماعالايكۇمىڭىز» ءاپ-ساتتە جەتەتىن جاقىن جەردە، جاماعايىن ەلدە ەكەنىنە قۋانىپ جۇرىڭىزدەر!» - دەپ جازعان ول.

جەلى قولدانۋشىلارى جازۋشىعا اماندىق تىلەپ، پىكىر قالدىرعان.

«ءتاڭىر ۇلتتىڭ ۇلى قالامگەرىنە قۋات بەرسىن!» «اعاي، قوش كەلدىڭىز! ەل ءىشى التىن بەسىك دەيدى عوي. ەلگە كەلگەندەي قۋانىپ قالدىق. اماندىق، دەنساۋلىق تىلەيمىن»، «زامانىمىزدىڭ زاڭعار جازۋشىسى. امان دا، ەسەن ءجۇرىڭىز»، «ۇلاعاتتى ۇستازىم، ادەبيەت ايدىنىنىڭ تەرەڭىنە سەنىم اتتى قايىققا وتىرعىزىپ، ەركىن ءجۇزىپ كەتۋگە ءسات-ساپار تىلەپ، جەلكەنىمدى قۋاتتى رۋحى كەرنەي جەبەگەن اسىل اعا امان ءجۇرىڭىز!» «اعامىز جاقسى جۇزەدى ەكەن ۇلى تۇلعامىز عوي! امان-ەسەن بولسىن!» - دەپ جازعان ولار.

ەسكە سالايىق، بۇعان دەيىن جازۋشى مۇحتار ماعاۋيننىڭ تۇركياعا كوشكەنى حابارلانعان ەدى.

بۇل تۋرالى ساپاربەك ناعاشىبەكوۆ facebook-پاراقشاسىندا ءبولىستى. ساپاربەك ناعاشىبەكوۆتىڭ ايتۋىنشا، مۇحتار ماعاۋيننىڭ ۇلى تۇركيادا تۇرادى. وعان قوسا، قاريا قازاقستانعا جاقىن كوشكىسى كەلگەن.