جەلتوقسان ايىنىڭ سوڭىندا كۇن كۇرت جىلىنۋى مۇمكىن

سينوپتيكتەردىڭ بولجامىنشا، جەلتوقسان ايىنىڭ سوڭىندا ەلىمىزدىڭ وڭتۇستىك وڭىرلەرىندە كۇن كۇرت جىلىنىپ، وزەن-كولدەردە سۋ تاسۋ قاۋپى تۋىنداۋى ىقتيمال.

بۇل ماسەلە بۇگىن كولىك مينيسترلىگىندە اۆتوموبيل جولدارىن كۇتىپ ۇستاۋ بويىنشا وتكەن ارنايى كەڭەستە تالقىلاندى، دەپ حابارلايدى Kazinform.

مينيسترلىكتىڭ باسپا ءسوز قىزمەتىنىڭ حابارلاۋىنشا، كەڭەسكە كولىك مينيسترلىگىنە قاراستى اۆتوجولدار كوميتەتى ءتوراعاسىنىڭ ورىنباسارى عالىمجان وتەنبايەۆ «قازاۆتوجول» ۇلتتىق كومپانياسى جانە «قاجسەرۆيس» ج ش س الماتى، جامبىل، قىزىلوردا جانە تۇركىستان، سونداي-اق جەتىسۋ وبلىستارى بويىنشا فيليالدارى باسشىلارى قاتىستى.

جول ماماندارى جاۋىن-شاشىننىڭ كوپ تۇسۋىنە جانە اۋا تەمپەراتۋراسىنىڭ جوعارىلاۋىنا بايلانىستى بولۋى ىقتيمال سۋ تاسقىنىنىڭ الدىن الۋ بويىنشا شارالاردى تالقىلادى.

وڭىرلەردەن كەلگەن وكىلدەرى جولدارداعى جاعداي مەن جۇرگىزىلىپ جاتقان جۇمىستار تۋرالى باياندادى. ءسوز كەزەگىندە ع. وتەنبايەۆ سۋ تاسقىنى قاۋپى بار ۋچاسكەلەردە كوپىرلەرگە، مال ايدىندارىنا، قۇبىرلارعا جانە جاساندى قۇرىلىستارعا مونيتورينگ جۇرگىزۋدى، سونىمەن بىرگە سۋ ايدىندارىنداعى سۋدىڭ دەڭگەيىن تەكسەرۋدى تاپسىردى.

مەتەورولوگتاردىڭ بولجامى بويىنشا، تۇركىستان وبلىسىندا 25- جەلتوقساننان كەيىن تەمپەراتۋرا 11 گرادۋسقا دەيىن، تارازدا 13+ گرادۋسقا دەيىن، قىزىلوردا وبلىسىندا 11+ گرادۋسقا گرادۋسقا دەيىن، شىمكەنتتە 14+ گرادۋسقا دەيىن، الماتىدا 11+ گرادۋسقا دەيىن كوتەرىلەدى دەپ كۇتىلۋدە. كۇن 1- قاڭتارعا دەيىن جىلى بولۋى مۇمكىن.