جۇلدىزقۇرتتىڭ قاپتاۋى: ش ق و- دا اۋىلداردى دارىلەۋ جۇمىستارى جۇرگىزىلىپ جاتىر
وسكەمەن. KAZINFORM - شىعىس قازاقستان وبلىسىندا جەر ۇيلەردىڭ باقشالارى مەن ورمان القاپتارىنا قاۋىپ توندىرەتىن جۇلدىزقۇرتتىڭ قاپتاپ كەتۋىنە قاتىستى ءتيىستى شارالار قولعا الىندى.
العاشقى حيميالىق وڭدەۋ جۇمىستارى قۇرتتار ەڭ كوپ تىركەلگەن بەلوگورسكوە اۋىلىنىڭ شەتىندە جۇرگىزىلدى. ولاردىڭ وشاقتارى ەلدى مەكەننەن 25 شاقىرىم جەردە. 30 - ماۋسىم كۇنگى وڭدەۋ جۇمىستارىنا «اسۋبۇلاق ورمان شارۋاشىلىعى» كمم ماماندارى قاتىستى. ۇلان اۋدانى اكىمدىگىنىڭ مالىمەتىنشە، وڭدەۋ سانيتارلىق تالاپتاردى ساقتاي وتىرىپ، رۇقسات ەتىلگەن حيميالىق پرەپاراتتارمەن جۇرگىزىلگەن.
- اشىق اۋماقتا 18 گەكتار جەر وڭدەلدى. بارلىعى بەكىتىلگەن نورمالارعا سايكەس ورىندالدى، - دەلىنگەن حابارلامادا.
الايدا ازىرگە بۇل جۇمىستار تەك جەكەلەگەن اۋماقتارمەن عانا شەكتەلىپ وتىر. اسۋبۇلاق جانە وگنەۆكا سياقتى باسقا دا اۋىلداردىڭ تۇرعىندارى ءالى كۇنگە دەيىن جاپپاي تاراعان جۇلدىزقۇرتپەن ءوز بەتىمەن كۇرەسىپ جاتىر.