جۇلدىز توي. ەتنوگراف ءۇش قىزىنا سۇندەت توي جاساعان ادامنىڭ ارەكەتىنە پىكىر ءبىلدىردى

ەتنوگراف بولات بوپاي ۇلى الەۋمەتتىك جەلىدە ءۇش قىزىنىڭ قۇرمەتىنە سۇندەت توي جاساعان وتباسىنا قاتىستى پىكىر ءبىلدىردى.

جەلىدە تاراعان ۆيدەودا ءۇش قىز تويحانانىڭ ورتاسىنا شىعىپ، حالىقتان سىيلىق جينايدى. ءتىپتى «سۇندەت توي» دەگەن جازۋى بار دوربانى دا ۇمىتپاپتى. جەلى قولدانۋشىلارى قىز بالالارعا سۇندەت توي جاساعانىنا تاڭعالىپ، بۇل ارەكەتتى «ەرىككەننىڭ ەرمەگى»، «ويىنا كەلگەنىن ىستەپ جاتىر» دەپ باعالاعان.

ال ەتنوگراف بولات بوپاي ۇلى مۇنى قازاق حالقى «جۇلدىز توي» دەپ اتايتىنىن ايتتى.

«قازاق حالقىنىڭ ەجەلدەن كەلە جاتقان سالت-ءداستۇرى بويىنشا كىشكەنتاي قىز 3 جاس، 5 جاس، 7 جاس، 9 جاسقا كەلگەندە، ونىڭ قۇلاعىن تەسىپ، التىن سىرعا سالادى. ءبىراق اق سارى باس قوي نەمەسە كوك قاسقا تاي شالىپ، اعايىندارىن شاقىرىپ، «سىرعا تاعۋ» تويىن جاسايدى. بۇل تويدى «سىرعا توي»، «سىرعا تاعۋ تويى» دەپ اتايدى. قازىرگى «جۇلدىز توي» دەپ اتالىپ جۇرگەن سالت سول - «سىرعا تاعۋ تويى» عوي»، - دەدى ول.