جۇلدىز سۇلەيمەنوۆا قاراپايىم ەڭبەك ادامدارىنىڭ جالاقىسىنا قاتىستى ماسەلە كوتەردى
استانا. KAZINORM -ءبىلىم بەرۋ، دەنساۋلىق ساقتاۋ مەكەمەلەرىندەگى ورتا جانە كىشى بۋىن ماماندارى مەن قىزمەتشىلەردىڭ ەڭبەكاقىسىن كەمىندە ەكى ەسەگە كوتەرۋ قاجەت.
بۇل تۋرالى ءماجىلىستىڭ جالپى وتىرىسىندا ۇكىمەت باسشىسىنىڭ ورىنباسارى تامارا دۇيسەنوۆاعا ساۋال جولداعان دەپۋتات جۇلدىز سۇلەيمەنوۆا ايتتى.
«مەملەكەت باسشىسى قاسىم-جومارت كەمەل ۇلى توقايەۆتىڭ «ءبىز قاراپايىم ەڭبەك ادامىنا قۇرمەت كورسەتۋىمىز كەرەك» دەگەن سوزدەرىنەن ەڭبەك ادامىنىڭ زاڭدى قۇقىقتارىن قورعاۋ، الەۋمەتتىك قولداۋ، ءومىر ساپاسىن جاقسارتۋ ارقىلى الەۋمەتتىك ادىلەتتىلىكتى قالىپتاستىرۋ مىندەتتەرى ايقىندالادى. جىل سايىن ۇكىمەت تاراپىنان ازاماتتىق قىزمەتشىلەردىڭ جالاقىسىندا بىلىكتىلىك ساناتتارىنا قولدانىلاتىن كوەففيتسيەنتتەردى ارتتىرۋ قاراستىرىلىپ، جالاقىلارى ءوسىپ كەلەدى. وكىنىشتىسى سول، مەكەمەلەردىڭ قىزمەتىن ەدەن جۋۋشى، اۋلا تازالاۋشى، سانتەحنيك، پلوتنيك، ەلەكتريك سەكىلدى قاراپايىم ەڭبەك ادامدارىنىڭ كۇندەلىكتى اۋىر جۇمىستارىنسىز جۇزەگە اسىرۋ مۇمكىن ەمەس بولسا دا، بۇگىندە وسى اتالعان جۇمىسشىلار ازاماتتىق قىزمەتشىلەر رەەسترىندە جوق. سوندىقتان، ۇكىمەت تاراپىنان ازاماتتىق قىزمەتشىنىڭ ايلىعىن ارتتىرعاندا وسى ەڭبەگى اۋىر جۇمىسشىلاردىڭ مۇددەسى ەسكەرىلمەي كەلەدى»،- دەدى ءماجىلىس دەپۋتاتى.
ونىڭ دەرەگىنشە، دەنساۋلىق ساقتاۋ، وقۋ- اعارتۋ سالاسىنداعى ەڭ اۋىر جۇمىستاردى اتقاراتىن جۇمىسشىلاردىڭ ايلىق جالاقىسى تومەن. مىسالى، مەكتەپتەردەگى ەدەن جۋۋشى - 82856 تەڭگە، ەلەكتريك - 81575 تەڭگە، اۋلا سىپىرۋشى 79317 تەڭگە جالاقى الادى. بۇگىنگى تاڭدا تەك ورتا ءبىلىم سالاسىندا 261 مىڭنان استام وسى ساناتتاعى جۇمىسشى بار. ولاردىڭ 254 مىڭىنىڭ قولىنا تيەتىن ايلىق جالاقىسى 74 مىڭ تەڭگەدەن 85 مىڭ تەڭگە ارالىعىندا عانا.
«ءبىلىم بەرۋ، دەنساۋلىق ساقتاۋ مەكەمەلەرىندەگى ورتا جانە كىشى بۋىن ماماندارى مەن قىزمەتشىلەردىڭ ەڭبەكاقىسىن كەمىندە ەكى ەسەگە كوتەرۋ قاجەت دەپ سانايمىز. اتقاراتىن جۇمىسىنىڭ كۇردەلىلىگىنە جانە اۋىرلىعىنا ءارى ەرەكشەلىگىنە قاراي لايىقتى جالاقى تاعايىندالۋى ءتيىس دەپ ەسەپتەيمىز. سەبەبى، جالاقى الەۋمەتتىك جاعدايدى، كۇنكورىس دەڭگەيىن، دەنساۋلىعىنا جانە بالالارىن ءوسىپ- جەتىلدىرۋگە جەتكىلىكتى بولۋى شارت. الەۋمەتتىك ادىلدىك زامانىندا جۇمىسى اۋىر، ەڭبەگى ادال جۇمىسشىلاردىڭ جالاقىسى ارتۋى قاجەت. حالقىمىزدا «ەڭبەك ادامى - ەلدىڭ قۇتى» دەگەن جاقسى ءسوز بار. «amanat» پارتياسىنىڭ فراكسياسى قاراپايىم ەڭبەك ادامدارىنا ساناتىنداعى جۇمىسشىلارعا لايىقتى جالاقى تولەۋدىڭ شىن مانىندە ءادىل ءارى ءبىرىڭعاي جۇيەسىن قۇرۋ جونىندە ۆەدومستۆوارالىق جۇمىس توبىنىڭ جاساقتالۋى كەزەك كۇتتىرمەيتىن ماسەلە دەپ بىلەمىز»، - دەدى جۇلدىز سۇلەيمەنوۆا.
وسىعان وراي ءماجىلىس دەپۋتاتى «amanat» پارتياسى فراكتسياسىنىڭ اتىنان مىناداي ۇسىنىستار ەنگىزدى:
- وقۋ- اعارتۋ مينيسترلىگى 2016-جىلدىڭ 29-قاڭتارىنداعى قازاقستان رەسپۋبليكاسى ءبىلىم جانە عىلىم ءمينيسترىنىڭ № 123 بۇيرىعىمەن بەكىتىلگەن ءبىلىم جانە عىلىم سالاسىنداعى ازاماتتىق قىزمەتشىلەر لاۋازىمدارىنىڭ ءتىزىلىمىن قايتا قاراپ، ەدەن جۋۋشى، پلوتنيك، سانتەحنيك، اۋلا تازالاۋشى، ەلەكتريك ساناتىنداعى جۇمىسشىلاردىڭ وسى تىزىلىمگە ەنگىزىلۋىن قاراستىرسىن.
- وقۋ-اعارتۋ مينيسترلىگى ۇلتتىق ەكونوميكا مينيسترلىگىمەن بىرلەسە وتىرىپ، رەسپۋبليكالىق بيۋدجەتتى ناقتىلاۋ كەزەڭىندە اتالعان جۇمىسشىلاردىڭ بازالىق لاۋازىمدىق جالاقىسىن ينفلياتسياعا جانە جۇمىستاردىڭ كۇردەلىلىگىنە سايكەس ۇلعايتۋدى قاراستىرسىن.
- وقۋ- اعارتۋ مينيسترلىگى قارجى مينيسترلىگىمەن بىرلەسە وتىرىپ، ەدەن جۋۋشى، پلوتنيك، سانتەحنيك، اۋلا تازالاۋشى، ەلەكتريك ساناتىنداعى جۇمىسشىلاردىڭ ەڭبەك دەمالىسىنا تولەنەتىن تولەم مولشەرىنە ساۋىقتىرۋ جاردەماقىسىن قوسۋ مۇمكىندىگىن قاراستىرىپ، رەسپۋبليكالىق بيۋدجەتتەن شىعىندارىن ەسەپتەسىن.