جەكسەنبى كۇنى ەلوردادا بايگە تۇرلەرىنەن رەسپۋبليكالىق تۋرنير وتەدى

استانا. KAZINFORM - ەلوردا ىرگەسىندەگى «قازانات» اتشابارىندا 4-مامىر كۇنى ۇلى جەڭىستىڭ 80 جىلدىعىنا وراي «Astana Cup» كلاسسيكالىق ات شابىسى مەن بايگە تۇرلەرىنەن رەسپۋبليكالىق تۋرنير وتەدى، دەپ حابارلايدى ەلوردا اكىمدىگىنىڭ رەسمي سايتى.

اتالعان دوداعا قازاقستاننىڭ بارلىق وڭىرىنەن بايگە اتتارى قاتىسادى دەپ كۇتىلۋدە. ءتۋرنيردىڭ جالپى جۇلدە قورى - 120000000 تەڭگە.

«اۋىزدىعىمەن الىسقان سايگۇلىكتەر كلاسسيكالىق ات جارىسى سانالاتىن ۇشقىر بايگەدە ءتورت قاشىقتىق بويىنشا باق سىنايدى: 1200 م، 1600 م، 1800 م جانە 2000 م. سونىمەن قاتار، 12 شاقىرىمدىق «توپ» بايگە مەن 18 شاقىرىمدىق «الامان» بايگە دە وتەدى. ايتا كەتۋ كەرەك، جالپى تۋرنيردىڭ جەڭىمپازدارى مەن جۇلدەگەرلەرىن ماراپاتتاۋ قارجىلاي سىياقى شىعىندارى، ياعني جۇلدە قورى دەمەۋشىلەر ەسەبىنەن جۇرگىزىلەدى»، - دەيدى قالالىق سپورتتىق-بۇقارالىق ءىس-شارالاردى وتكىزۋ ديرەكتسياسى باسشىسىنىڭ ورىنباسارى ەرجىگىت وسەرباي.

ءىس-شارانى استانا قالاسىنىڭ اكىمدىگى، تۋريزم جانە سپورت مينيسترلىگى جانە «ۇلتتىق سپورت قاۋىمداستىعى» بىرلەسىپ ۇيىمداستىرۋدا.

ايتا كەتەيىك، جۇيرىكتەر دوداسىنىڭ اشىلۋ سالتاناتى 4-مامىر كۇنى ساعات 12:00-دە وتەدى.

كورەرمەندەر ءۇشىن كىرۋ تەگىن.

سونىمەن قاتار، «قازانات» اتشابارىنا 303، 309 جانە 323-باعىتتارىنداعى اۆتوبۋستار قاتىنايدى.