جەكەمەنشىك مەكتەپتەرگە اۋىساتىن وقۋشىلار قاتارى ارتىپ كەلەدى

استانا. KAZINFORM - بيىل جەكەمەنشىك مەكتەپتەردە مەملەكەتتىك تاپسىرىستى ورنالاستىرۋعا قوسىمشا 66,7 ميلليارد تەڭگە قاجەت. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان.

«مەملەكەتتىك تاپسىرىستى ورنالاستىرۋ مەحانيزمىن قايتا قاراۋعا جانە قوسىمشا قاجەتتىلىككە قاتىستى مەملەكەت باسشىسىنىڭ تاپسىرماسىنا سايكەس وقۋ-اعارتۋ ءمينيسترى بۇيرىعىنىڭ جوباسى ازىرلەندى. جوبادا دەربەستەندىرىلگەن قارجىلاندىرۋ كوزدەلگەن. بۇل ءبىلىم بەرۋ تاپسىرىسىن ءبىلىم الۋشىنىڭ اتااناسىنا نەمەسە وزگە دە زاڭدى وكىلىنە بالاسىن وقىتۋعا بولىنەتىن بيۋدجەت قاراجاتىن قاداعالاۋعا مۇمكىندىك بەرەدى. قازىرگى كەزدە مەملەكەتتىك تاپسىرىس بويىنشا 677 جەكەمەنشىك مەكتەپتە 251,3 مىڭ وقۋشى ءبىلىم الۋدا. الايدا، جىل سايىن جاڭا وقۋ جىلىنىڭ باسىندا جەكەمەنشىك مەكتەپتەردىڭ سانى مەن ولارداعى وقۋشى كونتينگەنتىنىڭ وسۋىنە بايلانىستى قارجى تاپشىلىعى بار (2022 -جىلى - 174 وقۋشى ورنى بار 527 جەكە ۇيىم، 2023 -جىلى - 228 وقۋشى ورنى بار 616 جەكە ۇيىم، 2024 -جىلى - 259 وقۋشى ورنى بار 677 جەكە ۇيىم). وسىعان وراي جەكەمەنشىك مەكتەپتەردە مەملەكەتتىك تاپسىرىس شىعىستارىنىڭ كولەمىن ۇلعايتۋعا قوسىمشا قاراجات رەسپۋبليكالىق بيۋدجەتتى ناقتىلاۋ جانە تۇزەتۋ كەزىندە قاراستىرىلاتىن بولادى»، - دەدى ۇكىمەت باسشىسىنىڭ ورىنباسارى جاۋابىندا.

ونىڭ دەرەگىنشە، بيىلدىڭ وزىندە دە جەكەمەنشىك مەكتەپتەردە مەملەكەتتىك تاپسىرىستى ورنالاستىرۋعا قوسىمشا 66,7 ميلليارد تەڭگە قاجەتتىلىگى انىقتالدى. اتالعان قاراجات بيۋدجەتتى ناقتىلاۋ كەزىندە زاڭنامادا بەلگىلەنگەن تارتىپپەن قاراستىرىلماق.

«وقۋ-اعارتۋ مينيسترلىگىمەن جۇرگىزىلگەن تالداۋدىڭ ناتيجەسىندە 2023-2024 وقۋ جىلىندا مەملەكەتتىك مەكتەپتەردەن جەكەمەنشىك مەكتەپتەرگە 71 مىڭ وقۋشىنىڭ كوشۋى انىقتالدى. ءوز كەزەگىندە بۇرىن مەملەكەتتىك مەكتەپتەردە وقىعان وسى وقۋشىلار ءۇشىن قاراجات 2023-2025 -جىلدارعا ارنالعان جالپى سيپاتتاعى ترانسفەرتتەر مەن سۋبۆەنتسيالار تۇرىندە جەرگىلىكتى بيۋدجەتتەر بازاسىنا بەرىلگەن. الداعى ءۇش جىلعا قارجىلاندىرۋ كولەمى وقۋشىلاردىڭ بەلگىلى ءبىر بولىگىنىڭ مەملەكەتتىك مەكتەپتەردەن جەكەمەنشىك مەكتەپتەرگە كوشۋى جانە «اقشانىڭ وقۋشىنىڭ سوڭىنان ەرۋى» قاعيداتىن ەسكەرە وتىرىپ ەسەپتەلىندى. وسىعان وراي 2025-2027 -جىلدارعا ارنالعان رەسپۋبليكالىق بيۋدجەت تۋرالى زاڭ جوباسىندا جەكەمەنشىك مەكتەپتەردە مەملەكەتتىك تاپسىرىستى ورنالاستىرۋعا ارنالعان شىعىستاردى جەرگىلىكتى اتقارۋشى ورگاندارعا اعىمداعى نىسانالى ترانسفەرتتەر ارقىلى جىبەرۋ كوزدەلگەن»، - دەدى ول.

ۆيتسە- پرەمەردىڭ اتاپ وتۋىنشە، بۇل شارا ەگەر وقۋشىلار مەملەكەتتىك مەكتەپتەردەن جەكەمەنشىك مەكتەپتەرگە اۋىستىرىلاتىن جاعدايدا ەكى رەت قارجىلاندىرۋ تاۋەكەلىن بولدىرماۋ ماقساتىندا جانە قاراجاتتىڭ ءادىل ءبولىنۋىن قامتاماسىز ەتۋگە مۇمكىندىك بەرەدى.

«زاڭ جوباسىندا جەكەمەنشىك ورتا ءبىلىم بەرۋ ۇيىمدارىندا مەملەكەتتىك ءبىلىم بەرۋ تاپسىرىسىن ورنالاستىرۋعا 416,3 ميلليارد تەڭگە (179924 وقۋشى ورنى بار 528 جەكە ۇيىم) اعىمداعى نىسانالى ترانسفەرتتەر تۇرىندە قاراستىرىلعان»، - دەدى تامارا دۇيسەنوۆا.

 

اۆتور
مارلان جيەمباي