استانا. KAZINFORM – ءبىرىنشى جارتىلاي ورتا سالماقتا جۇدىرىقتاساتىن قازاقستاندىق كاسىپقوي بوكسشى باتىر جۇكەمبايەۆ (23-1، 17 ك و) WBC چەمپيوندىق اتاعىنا يە البەرتو پۋەلونى (23-0، 10 ك و) جەكپە-جەككە شاقىردى، - دەپ حابارلايدى msports.kz سايتى.
باتىر جەكپە-جەككە شاقىرعان دومينيكاندىق بوكسشى كاسىپقوي بوكستا جەڭىلىپ كورمەگەن. 23 رەت شارشى الاڭعا شىعىپ، بارىندە قارسىلاسىنان باسىم بولعان.
«ماعان جارتىلاي ورتا سالماقتاعى WBC چەمپيوندىق اتاعى كەرەك. البەرتو پۋەلو، وسى جەكپە-جەكتى وتكىزەيىك»، - دەپ جازدى بوكسشى.
قازاقستاندىق بوكسشى ءوز جازباسىندا WBC ۇيىمىنىڭ رەسمي اككاۋنتىن، پرەزيدەنتى ماۋريسيو سۋلەيمان مەن ProBox TV ارناسىن بەلگىلەي كەتكەن.
ايتا كەتەيىك، باتىر جۇكەمبايەۆ 22-مامىر كۇنى پلانت-سيتيدە (ا ق ش) ۋكراينالىق يۆان رەدكاچپەن جۇدىرىقتاسىپ، قارسىلاسىن 5-راۋندتا نوكاۋتپەن جەڭگەن بولاتىن.
Күнсұлтан Отарбай
Еуразия Ұлттық университетінің түлегі. Республикалық «Қазақ спорты», «Sport» газеттерінде қызмет атқарған.
2014 жылғы Сочи, 2016 жылғы Рио-Де Жанейро, 2017 жылғы Инчхон және 2024 жылғы Париж Олимпиадасында, сонымен қатар бір қанша Қысқы және Жазғы Азия ойындарынан, әлем біріншіліктеріне барып тікелей хабар таратқан журналист.
Сейдақмет Бердіқұлов атындағы арнайы сыйлықтың лауреаты.