جەكە مەنشىك مەكتەپتەردى قىسقارتۋ ساياساتى باستالىپ كەتتى مە - مينيستر جاۋابى

استانا. KAZINFORM - وقۋ-اعارتۋ ءمينيسترى عاني بەيسەمبايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا جەكە مەنشىك مەكتەپتەر نەگە جابىلا باستاعانىن ءمالىم ەتتى.

- QazBilim ورتالىعىنىڭ نەگىزىن قالاۋشى اياتجان احمەتجان 2023 -جىلدان بەرى جەكە مەنشىك مەكتەپتەرگە تولەنەتىن سۋبسيديا كەشىگىپ تولەنىپ جاتقانىن، سالدارىنان بيىلدىڭ وزىندە 20 مەكتەپ جابىلىپ قالعانىن ايتتى. مينيسترلىك جەكە مەنشىك مەكتەپتەردىڭ سانىن قىسقارتۋ ساياساتىن جۇرگىزىپ جاتىر ما، - دەپ سۇرادى ب ا ق وكىلى.

عاني بەيسەمبايەۆ مۇنىڭ سەبەبىن شاعىن مەكتەپتەردىڭ ۇستىنەن تۇسەتىن شاعىم كوبەيىپ كەتكەنىمەن ءتۇسىندىردى.

- بىزدە ساننان ساپاعا كوشۋ ماسەلەسى قولعا الىنىپ جاتىر. ءبىز جەر- جەردە اتا- انالاردان، اكىمدىكتەردەن كوپتەگەن شاعىم الىپ جاتىرمىز. جەكە مەنشىك مەكتەپتەردىڭ اشىلۋىنا قاتىستى بەيبەرەكەتتىكتىڭ ورىن الىپ جاتقاندىعى، مەكتەپ ورنى جەتكىلىكتى اۋدانعا مەكتەپ اشۋ جاعدايلارى، ماتەريالدىق- تەحنيكالىق تۇرعىدان تولىق جابدىقتاماي، اقشا تابۋ ماقساتىمەن عانا جۇمىس ىستەۋ فاكتورلارى بويىنشا شاعىمدار تۇسەدى. كەزىندە جەكە مەنشىكتەردىڭ سانى 100 بولسا، قازىر 900 گە قاراي كەتىپ بارادى. سوندىقتان ولاردىڭ ساپاسىنا باقىلاۋ ورناتۋىمىز كەرەك. ەرتەڭ ءدال ءسىز سول جەكە مەنشىك مەكتەپتەردەگى ساپا تۋرالى سۇراق قويىپ وتىرساڭىز مەن تاڭعالمايمىن. كەمشىلىكتەرگە جول بەرىپ قويماي، ءبارىنىڭ الدىن الۋىمىز كەرەك، - دەدى ول.

دەگەنمەن ول سوڭعى ءۇش جىلدا جەكە مەنشىك مەكتەپتەردى مەملەكەتتەن قولداۋ كولەمى 35 ميلليارد تەڭگەدەن 330 ميلليارد تەڭگەگە دەيىن ارتقانىن اتاپ ءوتتى.

- بۇگىنگى تاڭدا جەكە مەنشىك مەكتەپتەردىڭ قۇرىلتايشىلارىمەن، قاۋىمداستىعىمەن كەزدەسىپ، ساپا تۋرالى اڭگىمە قوزعاپ وتىرمىز. مەكەمە جەكە مەنشىك بولعانىمەن، بالا جەكە مەنشىك ەمەس. بالالاردىڭ بىلىمىنە، قاۋىپسىزدىگىنە كەز كەلگەن مەكەمە جاۋاپتى. ونى قاداعالاۋدى وزىمىزگە مىندەت ەتىپ الىپ وتىرمىز. ول بولجامدارمەن كەلىسەم، جەكە مەنشىك مەكتەپتەردىڭ ۇلەسى 5 پايىزعا دەيىن كەمۋى مۇمكىن. ءتيىستى جابدىقتارمەن جابدىقتالماسا سولاي بولادى. جوعارى اۋديتورلىق پالاتانىڭ تەكسەرۋىندە ءمالىم بولدى، جەرتولەدە دە مەكتەپ اشۋعا ۇمتىلعان ادامدار بار. ونداي مەكتەپتەر، ارينە، جابىلادى. جەكە مەنشىك مەكتەپتەر قاجەتتىلىك تۋىنداعان جەرلەردە عانا اشىلۋ كەرەك. ونداي مەكتەپتەردى قولداۋعا دايىنبىز. ءقازىر جەكە مەنشىك مەكتەپتەرمەن بىرلەسىپ تەكسەرۋ جۇرگىزىپ، زاڭسىزدىقتاردىڭ ستاتيستيكاسىن انىقتايمىز، - دەدى مينيستر.