جەكپە-جەك الدىندا ءوزىمدى ەمەس، اقجولدى كوبىرەك ۋايىمدادىم - دەمەۋ جادىرايەۆ

استانا. قازاقپارات - گرەك-ريم كۇرەسىنەن قازاقستانعا وليمپيادانىڭ كۇمىس جۇلدەسىن سىيلاعان دەمەۋ جادىرايەۆ جەكپە-جەك كەزىندە ءوزى ءۇشىن ەمەس، قىرعىزستاندىق بالۋان اقجول ماحمۇدوۆ ءۇشىن كوبىرەك ۋايىمداعانىن ايتتى.

«اقجول ماحمۇدوۆ - باۋىرىم. ءبىر-بىرىمىزگە ساتتىلىك تىلەدىك. كۇرەسەتىن كەزدە اعاسى رەتىندە قاراعاندىقتان دا دۇرىس كۇرەسە الماعان شىعار دەپ ويلايمىن. ءوزى دە سولاي ايتتى. «فينالعا شىق» دەپ ساتتىلىك تىلەپ كەتتى. مەن دە وعان «بوساڭسىما» دەدىم. اللاعا شۇكىر، فينالعا شىقتىم. ءوزىمدى ەمەس، اقجولدى كوبىرەك ۋايىمدادىم دەسەم دە بولادى. سەنەن ۇتىلعان بالۋان، كەلەسى اينالىمدا سەن ۇتىلعان جاعدايدا، مەدالعا تالاسۋ قۇقىعىنان ايىرىلادى. سول سەبەپتى جاۋاپكەرشىلىك بولدى. اقجولدى دا شىعارۋ كەرەك دەدىم. اقجولعا دا مۇمكىندىك بەرگەنىمە قۋانىشتىمىن. فينال الدىندا دەنە قىزدىرۋ جاتتىعۋلارى كەزىندە دە ءبىر-بىرىمىزگە ساتتىلىك تىلەدىك، تىلەۋلەس بولدىق، سونان سوڭ تۇعىردا بىرگە سۋرەتكە تۇستىك. كەرەمەت اسەر الدىق»، - دەدى دەمەۋ جادىرايەۆ Sport+Qazaqstan ارناسىنا بەرگەن سۇحباتىندا.

ەستەرىڭىزدە بولسا، پاريجدە توپ جارادى دەگەن «قىرعىزدىڭ اكۋلاسى» جادىرايەۆقا جول بەرىپ، كەيىننەن دەمەۋدىڭ فينالعا وتۋىنە بايلانىستى قولا جۇلدەگە تالاسۋعا مۇمكىندىك الدى. قىرعىزستاندىق جاس بالۋان بۇل مۇمكىندىكتى ءمۇلت جىبەرمەي، ەلىنىڭ قورجىنىنا پاريج وليمپياداسىنىڭ قولا جۇلدەسىن سالدى. جۇلدەگەرلەردى ماراپاتتاۋ كەزىندە قازاق- قىرعىز بالۋاندارى ەكەۋى سۋرەتكە ءتۇسىپ، ءبىر-بىرىنە دەگەن سىيلاستىقتى پاش ەتتى.