فيلم شىنايى وقيعاعا نەگىزدەلگەن.
سۇيىكتىسىنەن ايىرىلعان جاس ادۆوكات ايجان كاناروۆا جۇمىستىڭ سوڭىندا ءجۇرىپ، جەكە ومىرىنە كوڭىل بولمەي قويادى.
ەڭبەكقور ارۋدىڭ بىلىكتىلىگىن بايقاعان باسشىلىعى ونى ايەلدەردى زورلىق-زومبىلىقتان قورعاۋ بولىمشەسىنىڭ ينسپەكتورى ەتىپ تاعايىندايدى.
قىزمەت بارىسىندا ول تۇرمىستىق زورلىققا ۇشىراعان جانداردى جولىقتىرادى، ايەل قۇقىعىن قورعاپ، ولارعا جان-جاقتى كومەك پەن قولداۋ كورسەتەدى.
كەيدە ينسپەكتور ايجان زورلىق-زومبىلىققا قاتىستى قىلمىستىق تەرگەۋلەرگە دە قاتىسادى.
وقيعانىڭ شيەلەنىسكەن تۇسىندا باستى كەيىپكەردىڭ ارىپتەستەرى دە وتباسىلىق قىسىم كورىپ جۇرگەنى بەلگىلى بولادى. سوڭىندا ءبارى ماقساتىنا ادال بولعاندىقتان پروبلەمالاردى ويداعىداي جەڭىپ شىعادى.
تەلەسەريالدىڭ رەجيسسەرلەرى - بەيبىت ونەر، بەرىك جاحانوۆ، موديار ءابدىقادىروۆ جانە ەۆگەني پالامارچۋك.
پروديۋسەرلەرى - انار ءجۇنىسوۆا مەن اننا چاكيرتوۆا.
باستى رولدەردى تانىمال قازاقستاندىق اكتەرلەر جانەل سەرعازينا مەن ەركەبۇلان دايىروۆ وينايدى.
كورەرمەن 40 ءتۇرلى وقيعانىڭ العاشقى ءبولىمىن «Jibek Joly» تەلەارناسىنداعى جاڭا تەلەۆيزيا ماۋسىمىنىڭ باسىندا، 2024-جىلدىڭ قىركۇيەگىندە تاماشالايدى.