الەۋمەتتىك جەلىدە وقۋ ورنىندا تۇسىرىلگەن بەينەجازبا تاراپ، قىزۋ تالقىعا تۇسكەن ەدى. جاريالانىمداردا ايەلدىڭ ەدەن جۋۋشىنىڭ سۋ تولى شەلەگىن اياعىمەن تەپكەنى انىق كورىنەدى. سونداي-اق جەلىدەگىلەر ونى ليتسەي ديرەكتورىنىڭ جۇبايى دەپ تانىستىرىپ جاتىر.
الايدا ايەلدىڭ كىم ەكەنى تۋرالى سۇراعىمىزدى ءبىلىم باسقارماسى جاۋاپسىز قالدىردى.
باسقارما بەينەجازباداعى جاعدايدىڭ اقتاۋ قالاسىنداعى جەكەمەنشىك «تۇلپار» ليتسەيىندە بولعانىن راستادى. وقيعانىڭ ءمان-جايىن انىقتاۋ ءۇشىن قالالىق ءبىلىم ءبولىمى تاراپىنان ارنايى كوميسسيا قۇرىلعانىن ايتتى.
زەردەلەۋ بارىسىندا بارلىق تاراپتىڭ تۇسىنىكتەمەلەرى تىڭدالىپ، جاعدايعا قۇقىقتىق جانە ۇيىمداستىرۋشىلىق باعا بەرىلەدى. ونىڭ ناتيجەسى بويىنشا قولدانىستاعى زاڭناما اياسىندا ءتيىستى شارالار قابىلدانىلادى، - دەلىنگەن باسقارما حابارلاماسىندا.
الەۋمەتتىك جەلىدەگى جاريالانىمدا وقيعاعا بايلانىستى پوليتسياعا ارىز تۇسكەنى دە ايتىلعان. بۇل مالىمەتتى ناقتىلاۋ ءۇشىن ءتىلشى ماڭعىستاۋ وبلىسىنىڭ پوليتسيا دەپارتامەنتىنە ساۋال جولدادى. الايدا ماتەريال جاريالانعان ساتكە دەيىن جاۋاپ كەلمەدى.