جۇدىرىقتاي جۇمىلا بىلگەن جۇرتتىڭ الار اسۋى بيىك بولادى - ماۋلەن اشىمبايەۆ
استانا. KAZINFORM - سەنات ءتوراعاسى ماۋلەن اشىمبايەۆ قازاقستاندىقتاردى 1-مامىر - قازاقستان حالقىنىڭ بىرلىگى كۇنىمەن قۇتتتىقتادى.
«قۇرمەتتى دوستار!
بارشاڭىزدى قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن!
بۇل - تاتۋلىق پەن دوستىقتى دارىپتەيتىن، بەيبىتشىلىك پەن كەلىسىمدى نىعايتاتىن جانە ىرىس پەن ىنتىماقتى ارتتىراتىن مەرەكە.
حالقىمىز قاشاندا وسى قۇندىلىقتارعا تابان تىرەپ، قانداي جاعداي بولسا دا مىزعىماس بىرلىكتىڭ وزىق ۇلگىسىن كورسەتىپ كەلەدى. بيىل الاپات سۋ تاسقىنى كەزىندە وعان تاعى ءبىر مارتە كوز جەتكىزدىك.
شىن مانىندە، جۇدىرىقتاي جۇمىلا بىلگەن جۇرتتىڭ الار اسۋى بيىك بولادى. سوندىقتان پرەزيدەنتىمىز قاسىم-جومارت كەمەل ۇلى توقايەۆ قازاقستان حالقى اسسامبلەياسىنىڭ سەسسياسىندا سويلەگەن سوزىندە بىرلىك پەن ىنتىماق مەملەكەتتىك ساياساتتىڭ بۇلجىماس باعدارى بولىپ قالا بەرەتىنىن باسا ايتتى. بۇل رەتتە بۇگىنگى مەيرامنىڭ ءمانى مەن ماڭىزى ايرىقشا زور ەكەنى انىق. بارشاڭىزدى مەرەكەمەن قۇتتىقتاي وتىرىپ، ەلىمىزگە اماندىق، جەرىمىزگە تىنىشتىق، ءار وتباسىنا شاتتىق پەن قۋانىش تىلەيمىن!
بىرلىگىمىز جاراسىپ، بەرەكەمىز ارتا بەرسىن!»، - دەلىنگەن قۇتتىقتاۋدا.