جەدەل جاردەم بريگاداسىنان قانداي ءدارى-دارمەك تالاپ ەتە الاسىز

استانا. KAZINFORM - دەنساۋلىق ساقتاۋ مينيسترلىگى Kazinform ساۋالىنا جولداعان جاۋاپتا شاقىرۋعا شىققان جەدەل جاردەم بريگاداسى وزىمەن بىرگە قانداي ءدارى-دارمەك الىپ ءجۇرۋى كەرەكتىگىن ايتتى.

ماسەلە قايدان شىقتى؟

1-مامىردان باستاپ جەدەل جاردەم قىزمەتى مەن موبيلدى بريگادالار ەكىگە ءبولىنىپ جۇمىس ىستەي باستادى.

ناقتىراق ايتساق، جەدەلدىك دارەجەسى 1, 2, 3-ساناتقا جاتاتىن قوڭىراۋلارعا ءداستۇرلى جەدەل جاردەم قىزمەتى 24 ساعات بويى قىزمەت كورسەتسە، 4-ساناتتاعى قوڭىراۋلارعا ەمحانالار جانىنداعى ءموبيلدى بريگادالار ساعات 8.00-20.00 ارالىعىندا قىزمەت كورسەتەتىن بولعان. ال ساعات 8.00-دەن كەيىن بۇل ساناتتىڭ قوڭىراۋلارى بويىنشا دا جەدەل جاردەم بريگادالارى شىعۋى شارت.

بۇل جەردەگى 1، 2، 3-سانات دەپ وتىرعانىمىز - ينفاركت، ينسۋلت، تىنىس الۋ نەمەسە جۇرەك جۇمىسىنداعى وتكىر اقاۋلار، قان كەتۋ، سوققى الۋ نەمەسە جاراقاتتانۋ سەكىلدى جاعدايلارمەن بايلانىستى قوڭىراۋلار.

ال 4-ساناتقا سوزىلمالى اۋرۋى بار ناۋقاستاردان، دەنە قىزۋى كوتەرىلگەندەردەن، جۇكتى ايەلدەر مەن جاس بوسانعان انالاردان، ت. ب. تۇسەتىن قوڭىراۋلار جاتقىزىلعان.

ەكى بريگادانىڭ ايىرماشىلىعى نەدە؟

بۇعان دەيىن جەدەل جاردەم بريگادالارىنىڭ شاقىرتۋ تۇسكەن ورىنعا جەتۋ ۋاقىتى بىلايشا كورسەتىلگەن:

1-جەدەلدىك ساناتى - 10 مينۋتقا دەيىن
2-جەدەلدىك ساناتى - 15 مينۋتقا دەيىن
3-جەدەلدىك ساناتى - 30 مينۋتقا دەيىن.
ال ءموبيلدى بريگادالار قىزمەت كورسەتەتىن - جەدەلدىك ساناتىنداعى قوڭىراۋلارعا جەتۋ ۋاقىتى - 60 مينۋتقا دەيىن.
جينالمالى سومكەنىڭ ىشىندە نە بولۋ كەرەك؟

- جەدەل مەديتسينالىق كومەك (بۇدان ءارى ج م ك) سومكەسى موبيلدى بريگادالاردىڭ سومكەسىنەن ءدارى-دارمەكتەردىڭ جيناعى بويىنشا ەرەكشەلەنەدى. ج م ك سومكەسى ناۋقاستىڭ جاعدايىن تۇراقتاندىرۋ ءۇشىن قاجەتتى ءدارى-دارمەكتەر مەن مەديتسينالىق قۇرالدار جيناعىن قامتيدى. بۇل سومكە، ادەتتە، اۋرۋحانادان بۇرىن كومەك كورسەتۋ ءۇشىن قاجەت بولاتىن اۋىرسىنۋدى باساتىن دارىلەر، اللەرگياعا قارسى پرەپاراتتار، وتكىر جاعدايلاردى توقتاتۋ ءۇشىن قاجەتتى ءدارى-دارمەكتەر (مىسالى، ينفاركت، ينسۋلت، انافيلاكسيالىق شوك جاعدايلارىندا) جانە جاراقاتتار مەن كۇيىكتەرگە العاشقى كومەك كورسەتۋ قۇرالدارىن قامتيدى، - دەپ جازىلعان مالىمەتتە.

ال 1-مامىردان باستاپ ساعات 8.00-20.00 اراسىندا 4-ساناتتاعى شاقىرۋلارعا (سوزىلمالى اۋرۋى بار ناۋقاستار، دەنە قىزۋى كوتەرىلگەندەر، جۇكتى ايەلدەر مەن جاس بوسانعان انالار، ت. ب. - رەد. ) شىعۋ مىندەتتەلگەن موبيلدى بريگادالاردىڭ ءدارى-دارمەك قورجىنى ءداستۇرلى جەدەل جاردەم سومكەسىنەن جۇتاڭداۋ بولماق.

- مەديتسينالىق-سانيتاريالىق العاشقى كومەك ۇيىمدارىنىڭ ءموبيلدى بريگادالارىنىڭ سومكەسى قۇرام جاعىنان جمك بريگادالارىنىڭ سومكەسىنە قاراعاندا شەكتەۋلى بولادى. بۇل موبيلدى بريگادالاردىڭ نەگىزگى قىزمەتى شۇعىل جاعدايلارعا ەمەس، امبۋلاتورلىق دەڭگەيدەگى مەديتسينالىق كومەك كورسەتۋگە باعىتتالعانىمەن تۇسىندىرىلەدى. سوندىقتان ولاردىڭ سومكەسىندە نەگىزىنەن قاراپايىم ءدارى-دارمەكتەر مەن قۇرال- جابدىقتار - مىسالى، قىزۋ تۇسىرەتىن، اۋىرسىنۋدى باساتىن جانە تاعى دا باسقا پرەپاراتتار بولادى.

سونىمەن، ەكى سومكەنىڭ اراسىنداعى نەگىزگى ايىرماشىلىق - ولاردىڭ فۋنكتسيونالدىق ماقساتىندا جانە ءدارى-دارمەك جيىنتىعىنىڭ ارتۇرلىلىگىندە، سەبەبى ءارتۇرلى مەديتسينالىق جاعدايلارعا كومەك كورسەتۋ ءۇشىن ءارتۇرلى ءدارى- دارمەكتەر مەن قۇرالدار قاجەت، - دەپ جازادى مينيسترلىك ماماندارى.

قاي بريگادا قانداي كولىكپەن جۇرەدى؟

جاۋاپتا بۇل ەكى بريگادانىڭ مىنەتىن كولىكتەرى دە ەكى ءتۇرلى ەكەنى ايتىلعان.

- 1-3 جەدەلدىك ساناتىنداعى شاقىرۋلارعا ء(داستۇرلى جەدەل جاردەم) ۆ جانە س كلاسىنداعى سانيتارلىق اۆتوكولىكتەر پايدالانىلادى. ۆ كلاسىنداعى سانيتارلىق اۆتوكولىك ادەتتە ناۋقاستاردى تۇراقتى جاعدايىمەن تاسىمالداۋعا ارنالعان، ال س كلاسىنداعى سانيتارلىق اۆتوكولىك رەانيماتسيالىق ءىس-شارالار مەن قارقىندى تەراپيانى جۇرگىزىپ، ناۋقاستاردى تاسىمالداۋعا مۇمكىندىك بەرەدى. بۇل كولىك ءتۇرى، سونداي- اق ومىرلىك ماڭىزدى فۋنكتسيالاردى قولداۋ ءۇشىن ارنايى جابدىقتارمەن جابدىقتالعان جانە رەانيموبيل دەپ تە اتالادى، - دەپ جازىلعان مينيسترلىك مالىمەتىندە.

ال موبيلدى بريگادالارعا ا كلاسىنداعى كولىك بەرىلىپ وتىر.

- 4-جەدەلدىك ساناتىنداعى شاقىرۋلارعا ا كلاسىنداعى سانيتارلىق اۆتوكولىك جانە مساك ۇيىمدارىنىڭ مەديتسينالىق كومەگىنىڭ مامانداندىرىلماعان جەڭىل اۆتوكولىگىن پايدالانۋ كوزدەلەدى. ا كلاسىنداعى سانيتارلىق اۆتوكولىك قاراپايىم تاسىمالداۋدى تالاپ ەتەتىن، ءبىراق جمك قاجەت ەتپەيتىن ناۋقاستار ءۇشىن پايدالانىلادى. سونىمەن قاتار، مەديتسينالىق- سانيتاريالىق العاشقى كومەك ۇيىمدارىنىڭ مامانداندىرىلماعان جەڭىل اۆتوكولىكتەرى امبۋلاتورلىق كومەك كورسەتۋ نەمەسە جەدەل مەديتسينالىق كومەكتى قاجەت ەتپەيتىن جاعدايلاردى باقىلاۋعا ارنالعان، - دەلىنگەن جاۋاپتا.

اۆتور

ەسىمجان ناقتىباي