جازۋشىنىڭ جاستارعا كوزقاراسى

استانا.  قازاقپارات - مارحابات بايعۇت: جۇيەلى، ويلاستىرىلعان جان-جاقتى قامداستىرىلعان، ۇلتتىڭ بولاشاعىن كوزدەيتىن، مادەني- رۋحاني ىزدەنىستەر، جاڭاشا يننوۆاسيالىق ىزدەنىستەر دەيمىز عوي، ۇلتتىق سالت-داستۇرلەرىمىزدى جاڭاشىلدىقپەن ۇيلەستىرە وتىرىپ، ۇلاستىرا وتىرىپ، جاراستىرا وتىرىپ تەرەڭ ماعىنالى جۇمىس ىستەۋ كەرەك.

 مىنا، جاستاردى تەك ۇرانشىلدىققا، جالاڭ پاتريوتيزمگە، ايقاي- ۇيقايعا، اكسيالارعا بەيىمدەي بەرمەي، ولاردى كىتاپ وقۋعا، ءال- فارابيدەن باستاپ ۇلى بابالارىمىزدىڭ عىلىمي- ەكونوميكالىق ءتۇرلى سالالارداعى مۇرالارىن مەڭگەرتۋگە، اسىرەسە كوركەم ادەبيەتتى، اباي، مۇحتار اۋەزوۆتى كلاسسيكالىق كوركەم ادەبيەتتى، پروزانى، پوەزيانى مەڭگەرۋگە، وقۋعا، توپ-توپ بولىپ، كۋرس-كۋرس بولىپ، كوللەدج بەن ۋنيۆەرسيتەت بولىپ، تالقىلاۋعا، تالداۋعا سودان ونەگە ۇلگى الىپ تاربيەلەنۋگە كۇش سالۋىمىز كەرەك. سونداي جۇمىستار جەتىسپەيدى.

جاستار كوركەم ادەبيەتتەن الىستاپ كەتتى. مەن ۇنەمى ايتىپ ءجۇرمىن. كىتاپتان الىستاعان ۇرپاقتىڭ بولاشاعى بۇلدىر، كەلەشەگى كۇڭگىرت دەپ قايتا-قايتا جازىپ ءجۇرمىن. بۇل ءبىزدىڭ كىتاپتارىمىزدى وقىسىن دەگەن ماسەلە ەمەس. جالپى، كوركەم ادەبيەتكە بەت بۇرماساق، ءبىز وڭبايمىز، وڭالمايمىز. ءبىزدىڭ ۇرپاق وڭبايدى. مىنا، مەكتەپتەردەگى ءتۇرلى قىلمىستار، بۇزاقىلىقتار، قاتىگەزدىك، مەيىرىمنىڭ جوعالۋى، دوستىقتىڭ، ماحاباتتىڭ جۇدەۋى، وسىنداي قاسيەتتەردىڭ، تەك جاستار عانا ەمەس، ەرەسەكتەردىڭ، ۇلكەندەردىڭ اراسىنداعى وسىنداي قارىم-قاتىناستاردىڭ جۇدەۋى، قۇلدىراۋى، ادامگەرشىلىك قاسيەتتەردىڭ توزۋى، اعايىندار اراسىنىڭ سۋىپ بارا جاتقانى، وسىنىڭ ءبارى سول كوركەم ادەبيەتتى وقىماۋدان.

جاستاردى جاماندايدى، ونداي بولىپ كەتتى، مۇنداي بولىپ كەتتى دەپ جاتادى. مەنىڭ پىكىرىم باسقا. قازىرگى جاستار وتە وجەت، العىر، جان-جاقتى ۇمتىلىپ جاتىر، بيزنەسكە دە ۇمتىلىپ جاتىر، ىسكەرلىككە، كاسىپكەرلىككە دە ۇمتىلىپ جاتىر، شەت ەلدەردە «بولاشاق» باعدارلاماسىمەن وقىپ تا جاتىر، ستۋدەنت جاستاردىڭ دا ۇمتىلىستارى، جۇمىس ىستەپ، جاڭادان تىرلىك جاساپ جۇرگەن جاستاردىڭ دا ەكپىنى جاقسى. ءبىر عانا ماسەلە، سول جوعارىدا ايتقان رۋحاني جاعىنان ولقىلىقتار بار. الا-قۇلالىق كوپ. كىتاپ وقىمايدى. جاستاردىڭ باستى كەمشىلىگى سول. سوعان بەت بۇرماي جاستار تولىققاندى ازامات بولا المايدى.
serpin.info