جازدا قانداي سۋ تۇتىنۋ كەرەك - دارىگەر كەڭەسى

استانا. KAZINFORM - اپتاپ ىستىقتا ءشولدى باسۋ ءۇشىن ەڭ ءتيىمدى سۋسىن - كادىمگى تازا سۋ. جامبىل وبلىسىنىڭ سانيتاريالىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى سالتانات الىبايەۆا شىلدەنىڭ شىلىڭگىرىندە اعزانى دۇرىس ىلعالداندىرۋدىڭ ماڭىزىنا توقتالدى.

ول گازدالعان جانە قانتتى سۋسىنداردان باس تارتۋعا كەڭەس بەردى.

ماماننىڭ ايتۋىنشا، كۇن ىستىقتا بولمە تەمپەراتۋراسىنداعى قاراپايىم سۋ نەمەسە تابيعي جەمىس سۋسىنى، كومپوت ىشكەن دۇرىس.

ال شاي ىشەتىن بولساڭىز، ونى دا سۋىتىپ ىشكەن ءجون.

«گازدالعان، ءتاتتى سۋسىندار مەن ەنەرگەتيكتەردىڭ اعزاعا پايداسىنان گورى زيانى كوپ. ولار ءشولدى ۋاقىتشا عانا باسادى دا، كەيىننەن قايتا شولدەتىپ، اسقازانعا اۋىرلىق تۇسىرەدى»، - دەدى سالتانات قورداباي قىزى.

سونداي-اق ول شىلدەدەگى اپتاپتا سۋدى جەتكىلىكتى مولشەردە تۇتىنۋ قاجەت ەكەنىن اتاپ ءوتتى.

دارىگەرلەردىڭ ايتۋىنشا، ادام اعزاسىنا تاۋلىگىنە 1 ك گ سالماققا شامامەن 30 م ل سۋ قاجەت. بۇل - ەرەسەك ادام ءۇشىن كۇنىنە 1,5 ليتردەن 2- 3 ليترگە دەيىن سۇيىقتىق ءىشۋ كەرەك دەگەن ءسوز.

مامان ىستىق كۇندەرى اس ءمازىرىن دە جەڭىلدەتۋگە شاقىرادى.

«اش جۇرۋگە بولمايدى. ەڭ دۇرىسى - ءار 2- 3 ساعات سايىن از- ازدان تاماقتانۋ. اۋىر، قۋىرىلعان تاعامداردان گورى كوكونىس، جەمىس پەن سالقىنداتىلعان سورپاعا باسىمدىق بەرگەن ابزال»، - دەپ كەڭەس بەردى سالتانات الىبايەۆا.

ايتا كەتەيىك، كۇنىنە 7000 قادام ءجۇرۋدىڭ دەنساۋلىققا پايداسى دالەلدەندى.