جازعى وليمپيا ويىندارى-2024: سەگىزىنشى جارىس كۇنىنىڭ ناتيجەسى

استانا. KAZINFORM - تۋريزم جانە سپورت مينيسترلىگى پاريج وليمپياداسىنىڭ كەزەكتى كۇنىنىڭ ناتيجەسىن جاريالادى.

سپورتتىق گيمناستيكا: ناريمان قۇربانوۆ سپورتتىق گيمناستيكانىڭ ات سناريادىنداعى جاتتىعۋدا كۇمىس جۇلدەگە قول جەتكىزدى. وتانداسىمىز فينالدا 15.443 ۇپاي الدى. وسىلايشا، ناريمان ەلىمىزگە سپورتتىق گيمناستيكادان وليمپيادانىڭ العاشقى مەدالىن سىيلادى.

ميلاد كاريمي سپورتتىق گيمناستيكانىڭ ەركىن جاتتىعۋ فينالىندا 14.500 ۇپاي جيناپ، 5-ورىنعا يە بولدى.

بوكس: نازىم قىزايباي (50 ك گ) شيرەك فينالدا ينگريت لورەنا ۆالەنسيا ۆيكتوريانى (كولۋمبيا) جەڭدى. ەندى نازىم فينال جولداماسىن قىتاي بوكسشىسىمەن ساراپقا سالادى.

ستەند اتۋ: ستەند اتۋدىڭ سكيت باعدارلاماسىندا ايەلدەر اراسىنداعى ىرىكتەۋدىڭ العاشقى جارىس كۇنىندە وتانداسىمىز اسەم ورىنباي 67 ۇپاي جيناپ، 23-ساتىعا جايعاستى.

سكيت باعدارلاماسىنىڭ ەرلەر اراسىنداعى ىرىكتەۋدە ۇلتتىق قۇراما سپورتشىسى ەدۋارد ەشەنكو 115 ۇپاي جيناپ، فينالعا شىعا المادى.

دزيۋدو: دزيۋدودان ارالاس كوماندالىق سايىستا ەلىمىزدىڭ كومانداسى برازيلياعا جول بەردى. ەسەپ: 2-4.

ۆەلوسپورت: ەرلەر اراسىنداعى توپتىق جارىستا ۇلتتىق قۇراما سپورتشىسى الەكسەي لۋتسەنكو مارەگە 52-بولىپ جەتتى. ونىڭ ۋاقىت كورسەتكىشى - 6 ساعات، 26 مينۋت 57 سەكۋند. جەڭىمپازدان 7 مينۋت 23 سەكۋند قالىپ كەتتى. وكىنىشكە قاراي، ەۆگەني فەدوروۆ جارىستى ورتا جولدا اياقتاپ، مارەگە جەتە العان جوق.

وليمپيادانىڭ سەگىزىنشى جارىس كۇنىنەن كەيىن قازاقستان قۇراماسىنىڭ قورجىنىندا 1 التىن، 1 كۇمىس، 2 قولا جۇلدە بار.