جازعى كانيكۋلدا وقۋشىلار مەن ستۋدەنتتەر جۇمىس ىستەي الادى
استانا. KAZINFORM - ۇكىمەت باسشىسى ولجاس بەكتەنوۆ جازعى دەمالىستا جۇمىس ىستەگىسى كەلەتىن وقۋشىلار مەن ستۋدەنتتەردى جۇمىسپەن قامتۋدى تاپسىردى.
- بىرىنشىدەن، ءوڭىر اكىمدىكتەرى جانە وقۋ-اعارتۋ مينيسترلىگى مەملەكەت باسشىسىنىڭ ساۋىقتىرۋ لاگەرلەرى مەن بالالاردىڭ يننوۆاتسيالىق شىعارماشىلىعى ورتالىقتارىن سالۋ تۋرالى تاپسىرماسىن ورىنداۋ قارقىنىن جەدەلدەتۋگە ءتيىس. بارلىق وبەكتى بەلگىلەنگەن مەرزىمدە تاپسىرىلۋى كەرەك.
ەكىنشىدەن، تۋريزم جانە سپورت مينيسترلىگى بالالاردىڭ تاريحي- مادەني مۇرا وبەكتىلەرىنە، تانىمال تۋريستىك ايماقتارعا بارۋى ءۇشىن اكىمدىكتەردىڭ ءوڭىرارالىق ءوزارا ءىس- قيمىلىن ۇيلەستىرسىن. باتىس وڭىرىندەگى بالالارعا ەلىمىزدىڭ شىعىس ايماقتارىن كورىپ-ءبىلۋ قىزىقتى بولماق.
ال وڭتۇستىك وبلىستارداعى وقۋشىلاردىڭ سولتۇستىك ايماقتارعا جانە كەرىسىنشە ساياحاتتاپ بارۋىن ۇيىمداستىرۋ قاجەت، - دەدى ولجاس بەكتەنوۆ ۇكىمەت وتىرىسىندا.
پرەمەر- ءمينيستردىڭ مالىمدەۋىنشە، بالالار ەلىمىزدىڭ كورىكتى جەرلەرى مەن باي مادەني مۇراسىن تانىپ- ءبىلۋى ءتيىس.
- مادەنيەت جانە اقپارات مينيسترلىگى جازعى دەمالىس كەزىندە بالالاردىڭ مۋزەيلەرگە، تەاترلارعا، قورىقتارعا، ۇلتتىق پاركتەرگە تەگىن بارۋىن قامتاماسىز ەتسىن.
ۇشىنشىدەن، ەڭبەك جانە حالىقتى الەۋمەتتىك قورعاۋ مينيسترلىگى مەن اكىمدىكتەر جۇمىس ىستەۋگە نيەت بىلدىرگەن وقۋشىلار مەن ستۋدەنتتەردى ۋاقىتشا جۇمىس ورىندارىمەن قامتاماسىز ەتۋ شارالارىن قابىلداسىن. بۇل رەتتە ولاردىڭ ەڭبەك قۇقىقتارى ساقتالۋعا ءتيىس، - دەيدى ول.
بۇعان دەيىن ولجاس بەكتەنوۆ مەكتەپ ءبىتىرۋ كەشىندە بالالاردىڭ قاۋىپسىزدىگىنە ەرەكشە نازار اۋدارۋ قاجەتتىگىن ايتتى.
سونداي- اق ۇكىمەت باسشىسى بالالاردى سۋدا جانە ءورت كەزىندە قۇتقارۋ داعدىلارىنا ۇيرەتۋ قاجەتتىگىنە توقتالدى.