جايىق وزەنىنەن اتىراۋ ماڭىنداعى 5 ەلدى مەكەنگە قاۋىپ ءتونۋى مۇمكىن
اتىراۋ. KAZINFORM - جايىق وزەنىندەگى سۋ دەڭگەيىنىڭ كوتەرىلۋىنە بايلانىستى اتىراۋ قالاسىنىڭ ماڭىنداعى 5 ەلدى مەكەنگە قاۋىپ ءتونۋى مۇمكىن.
اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ ايتۋىنشا، الداعى كۇندەرى جايىق وزەنىندەگى سۋ دەڭگەيى ەڭ جوعارى شەگىنە جەتۋى مۇمكىن.
«اتىراۋ وبلىسىندا سۋ تاسقىنىنىڭ قاۋپى ءالى دە كۇردەلى كۇيدە قالىپ تۇر. قازىر جايىق وزەنىمەن اعىپ كەلەتىن تاسقىن سۋدىڭ كوپ مولشەرى اتىراۋ وبلىسىنىڭ اۋماعىنا كىردى. كۇن سايىن يندەر، ماحامبەت اۋداندارى مەن اتىراۋ قالاسىنداعى گيدروبەكەتتەردە سۋ دەڭگەيىنىڭ كوتەرىلۋ كورسەتكىشى تىركەلىپ وتىر. يندەر جانە ماحامبەت اۋدانىندا سۋ دەڭگەيى قاۋىپتى شەكتەن اسىپ كەتتى. ءبىراق، وزەن جاعالاۋىندا سالىنعان بوگەت ەلدى مەكەندەردى سۋ باسۋ قاۋپىنەن قورعاپ تۇر»، - دەپ حابارلادى جاسۇلان بيسەمبيەۆ.
اكىم ورىنباسارىنىڭ ايتۋىنا قاراعاندا، بۇگىن تۇندە يندەر اۋدانىندا ەسكى قۇبىر ارقىلى تاسقىن سۋ ەلدى مەكەن اۋماعىنا كىرگەن.
«يندەربور كەنتىندە دەر كەزىندە تاسقىن سۋدى توقتاتۋعا قاتىستى قاجەتتى ءىس- شارا قابىلداندى. سونىڭ ناتيجەسىندە تاسقىن سۋ باسۋ قاۋپى سەيىلدى»، - دەدى جاسۇلان بيسەمبيەۆ.
ال، اتىراۋ قالاسىندا جايىق وزەنىنىڭ جاعالاۋىنا 250 شاقىرىمنان استام بوگەت تۇرعىزىلعان.
«قازىر اتىراۋ قالاسىنىڭ ماڭىنداعى بەسىكتى، المالى، تالعايراڭ، اقجار، اقساي ەلدى مەكەندەرى سۋ باسۋ قاۋپى باسىم اۋماقتا قالىپ وتىر. وسىعان بايلانىستى جايىق وزەنىنىڭ جاعالاۋىندا تاۋلىك بويى كەزەكشىلىك ۇيىمداستىرىلدى»، - دەپ ءمالىم ەتتى جاسۇلان بيسەمبيەۆ.
ەسكە سالا كەتەلىك، بۇدان بۇرىن اتىراۋ وبلىسىنداعى تالدىكول اۋىلىنىڭ تۇرعىندارىن ەۆاكۋاتسيالاۋ باستالعانىن حابارلاعان ەدىك.
سونداي- اق، اتىراۋ - ورال تراسساسىنان يندەربورعا بۇرىلاتىن 7 شاقىرىم جولدى تاسقىن سۋ شايىپ كەتتى.