جايىق جاعاسىنداعى 84 ەلدى مەكەندى امان الىپ قالدىق - شىڭعىس ءارىنوۆ

 استانا. KAZINFORM - توتەنشە جاعدايلار ءمينيسترى شىڭعىس ءارىنوۆ «ءبىز بىرگەمىز» جالپىۇلتتىق تەلەكوپىرىندە جايىق بويىنداعى جاعداي تۋرالى مالىمەت ۇسىندى.

«قازىرگى تاڭدا جايىقتىڭ قاتەرلى تولقىنى باتىس قازاقستان وڭىرىنەن ءوتىپ، اتىراۋ وبلىسىنا بەتالدى. ءبىراق جايىق بويىنداعى 84 ەلدى مەكەندى امان الىپ قالدىق دەپ ايتساق بولادى. وعان دەر كەزىندە اتقارىلعان دايىندىق جۇمىستارى سەبەپ بولدى. وزدەرىڭىز كوردىڭىزدەر، قانشاما شاقىرىم بوگەت سالىندى. بۇكىل ەل بولىپ بارلىق وڭىردەن ارنايى تەحنيكا، كۇش قۇرىلىمدارى كەلىپ جاتىر. سونىڭ ارقاسىندا ءبارى ۋاقىتىندا ىستەلىپ، جايىق دەڭگەيى كوتەرىلگەنىنە قاراماستان 84 ەلدى مەكەنگە ەشقانداي قاۋىپ بولعان جوق»، - دەدى ول.

ۆەدومستۆو باسشىسى وسى جۇمىستارعا اتسالىسقان بارشا قازاقستاندىقتارعا العىس ايتتى.

«وسى ءساتتى پايدالانىپ، ءوزىمىزدىڭ قۇتقارۋشىلارعا، قارۋلى كۇشتەردىڭ، ىشكى ىستەر مينيسترلىگىنىڭ، ۇلتتىق قاۋىپسىزدىك كوميتەتىنىڭ، مەملەكەتتىك كۇزەت قىزمەتىنىڭ وكىلدەرىنە، بارلىق كۇشتىك قۇرىلىمداردىڭ ساربازدارىنا ريزاشىلىعىمدى بىلدىرەمىن. سونداي- اق، تاسىمالداۋعا اتسالىسقان ق ت ج ۇلتتىق كومپانياسىنىڭ وكىلدەرىنە، تاسقىنمەن كۇرەسكە اتسالىسقان ادامداردىڭ بارىنە راحمەت ايتقىم كەلەدى»، - دەدى مينيستر.