جايىلىم تاپشىلىعى ەكى ەسەگە ازايدى – ا ش م

استانا. قازاقپارات - 916,8 مىڭ گ ا جايىلىم رەزەرۆكە قويىلدى. بۇل تۋرالى اۋىل شارۋاشىلىعى ۆيتسە-ءمينيسترى ازات سۇلتانوۆ ايتتى.

- جەرگىلىكتى اتقارۋشى ورگاندار اۋىل تۇرعىندارىن جايىلىممەن قامتاماسىز ەتۋ بويىنشا اۋقىمدى جۇمىستاردى اتقارىپ جاتىر. ماسەلەن، 1 ميلليون 124,6 مىڭ گەكتار جايىلىم حالىقتىڭ مالىن جايۋ ءۇشىن ورتاق پايدالانۋعا بەكىتىلدى. 723,1 مىڭ گەكتار جايىلىمعا جەر پايدالانۋ قۇقىعى كونكۋرستىق نەگىزدە بەرىلدى. ەلدى مەكەندەردىڭ شەكاراسى ىرگەلەس جاتقان 79,4 مىڭ گەكتار جايىلىم جەرىمەن كەڭەيتىلدى. 916,8 مىڭ گا جايىلىم رەزەرۆكە قويىلدى، - دەدى ا. سۇلتانوۆ پارلامەنت ماجىلىسىندە «جايىلىم تۋرالى» زاڭىنىڭ ىسكە اسىرىلۋىن تالقىلاۋ بارىسىندا.

ونىڭ ايتۋىنشا، ءتيىستى ءىس-شارالار مەن مال باسى بويىنشا ەسەپتىك دەرەكتەردى قايتا قاراۋ ناتيجەسىندە، ەلدەگى جايىلىم تاپشىلىعى ەكى ەسەگە، ياعني 8,4 ميلليون گەكتاردان 4,3 ميلليون گەكتارعا دەيىن ازايدى.

- سونىمەن قاتار، وسى كۇنگە دەيىن مەملەكەت مەنشىگىنە قايتارىلعان 2 ميلليون گەكتار جايىلىم حالىقتىڭ ورتاق پايدالانۋىنا بەكىتىلدى، - دەدى ۆيتسە- مينيستر.

ەسكە سالساق، جاقىندا جايىلىمدى توزۋدان قالاي ساقتاۋعا بولاتىنى جايىندا جازعان ەدىك.

بۇعان دەيىن حابارلانعانداي، بىلتىر كۇزدە ستراتەگيالىق جوسپارلاۋ جانە رەفورمالار اگەنتتىگى Kazinform ساۋالىنا جولداعان جاۋاپتا ەلدەگى مال سانىن قولدان كوبەيتىپ جازعان وڭىرلەردى اتادى.

اۆتور

رۋسلان عابباسوۆ