جايلى مەكتەپتەردىڭ جەكە باسقارۋ جۇيەسى بولادى

استانا. KAZINFORM - «جايلى مەكتەپ» ۇلتتىق جوباسى اياسىندا سالىنعان مەكتەپتەر ءۇشىن جەكە باسقارۋ جۇيەسى ەنگىزىلەدى. بۇل تۋرالى ۇكىمەت وتىرىسىندا مەملەكەت باسشىسىنىڭ جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ جوباسىن تانىستىرعان پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.

«اقشا بالاعا» قاعيداتى بويىنشا مەملەكەتتىك تاپسىرىس شەڭبەرىندە مەكتەپكە دەيىنگى تاربيە مەن وقىتۋدى قارجىلاندىرۋدىڭ ديففەرەنتسياتسيالانعان ءتاسىلى مودەلىنە ەرەكشە نازار اۋدارىلاتىن بولادى. الداعى 3 جىل ىشىندە ەل بويىنشا 1300 مەكتەپتى، ونىڭ ىشىندە دەمەۋشىلىك قاراجاتى ەسەبىنەن قايتا جاڭارتۋ جوسپارلانۋدا. سونىمەن قاتار، «جايلى مەكتەپ» ۇلتتىق جوباسى اياسىندا سالىنعان مەكتەپتەر ءۇشىن جەكە باسقارۋ جۇيەسى كوزدەلەتىن بولادى»، - دەدى نۇرلان بايبازاروۆ.

ءمينيستردىڭ ايتۋىنشا، الەۋمەتتىك بلوكتا ءبىلىم بەرۋدىڭ، دەنساۋلىق ساقتاۋدىڭ جانە سپورتتىڭ ساپاسى مەن قولجەتىمدىلىگىن ارتتىرۋ، ونىڭ ىشىندە ولاردى قارجىلاندىرۋدى رەفورمالاۋ ماسەلەلەرى بويىنشا شارالار قابىلدانادى.

وسى ماقساتتا مەملەكەتتىك-جەكەشەلىك ارىپتەستىك تەتىگىن، «الەۋمەتتىك ءاميان» قۇرالىن پايدالانۋ، ءبىلىم بەرۋ گرانتتارىن ديففەرەنتسياتسيالاۋ جانە تاعى باسقالار قاراستىرىلادى.

«تۋريزم سالاسىندا كاتونقاراعاي، زايسان جانە كەندىرلى كۋرورتتىق ايماقتارىندا قاجەتتى ينفراقۇرىلىممەن قامتاماسىز ەتە وتىرىپ، اەروۆوكزال كەشەندەرى مەن اۋەجايلاردى سالۋ بويىنشا جۇمىستار كوزدەلىپ وتىر. ونەركاسىپتى دامىتۋ قورى ارقىلى شاعىن اۆياتسيا اۋە كەمەلەرىن ساتىپ الۋ جوسپارلانۋدا. بۇل شارالار ىشكى تۋريزمدى دامىتۋعا قوسىمشا سەرپىن بەرەدى»، - دەدى ول.

اۆتور
مارلان جيەمباي