Queensberry Promotions پروموۋتەرلىك كومپانياسى WBO- عا شيراز قازاقستاندىق جانىبەك ءالىمحان ۇلىنا قارسى مىندەتتى جەكپە-جەككە شىقپايتىنىن حابارلاعان. جانىبەك بۇل كەزدەسۋگە رەسمي مىندەتتى ۇمىتكەر مارتەبەسىن العان ەدى.
ۇيىمنىڭ مالىمەتىنشە، پروموۋتەرلىك ساۋدا قورىتىندىسى بويىنشا بەلگىلەنگەن شارتتاردى قاراستىرعاننان كەيىن شيراز چەمپيوندىق بەلبەۋىن ءوز ەركىمەن بوساتۋعا شەشىم قابىلداعان.
«WBO حامزا شيراز بەن ونىڭ كومانداسىنىڭ شەشىمىنە قۇرمەتپەن قارايدى. سونداي-اق، بوكسشىلار مەن ولاردىڭ كوماندالارى سپورتشىنىڭ مۇددەسىنە ساي دەپ تاپقان جاعدايدا كاسىبي مانسابىنا قاتىستى شەشىمدى وزدەرى قابىلداۋعا قۇقىلى ەكەنىن مويىندايدى»، - دەلىنگەن WBO مالىمدەمەسىندە.
شيرازدىڭ ءالىمحان ۇلى تۋرالى مالىمدەمەلەرى
ۇلى بريتانيالىق بوكسشى WBO- نىڭ قازاقستاندىق سپورتشىنى مىندەتتى ۇمىتكەر رەتىندە بەكىتۋ تۋرالى شەشىمىنە كوڭىلى تولمايتىنىن ايتقان. ءتىپتى ءالىمحان ۇلىنىڭ ەكىنشى ورتا سالماقتاعى الەم چەمپيونى اتاعىنا مىندەتتى ۇمىتكەر اتانۋىنا WBO- داعى جەمقورلىقتىڭ قاتىسى بولۋى مۇمكىن دەگەن پىكىر بىلدىرگەن.
سونداي-اق، شيراز بەلگىلى جۋرناليست اريەل حەلۆانيگە بەرگەن سۇحباتىندا WBO شەشىمىن «كۇلكىلى» ءارى «بوكس ءۇشىن ماسقارا جاعداي» دەپ اتادى. ونىڭ ايتۋىنشا، ۇيىم مەلدونييگە تاپسىرعان سىناماسى وڭ ناتيجە كورسەتكەن بوكسشىعا وسىلايشا ارتىقشىلىق بەرىپ وتىر.
ەندى ۇلى بريتانيالىق بوكسشى رەسمي مىندەتتى ۇمىتكەرمەن جەكپە-جەك وتكىزبەستەن، WBO چەمپيوندىق بەلبەۋىن ءوز ەركىمەن بوساتۋعا شەشىم قابىلدادى.
بۇعان دەيىن حامزا شيرازدىڭ وكىلدەرى جەڭىلىس كورمەگەن قازاقستاندىق جانىبەك ءالىمحان ۇلىنا قارسى جەكپە-جەكتى وتكىزۋ قۇقىعىنا ارنالعان پروموۋتەرلىك ساۋدادا جەڭىسكە جەتكەن ەدى. ءتىپتى كەزدەسۋدىڭ الدىن الا وتەتىن كۇندەرى مەن قالالارى دا بەلگىلەنگەن بولاتىن.