كەزدەسۋ 2027-جىلعى 23-قاڭتاردا دانيانىڭ حورسەنس قالاسىندا وتەدى. بوكسشىلار سۋپەرورتا سالماقتاعى WBO ۇيىمىنىڭ بوس تۇرعان چەمپيوندىق بەلبەۋىنە تالاسادى.
ۇيىمداستىرۋشىلار بيلەت قۇنىن 699 دات كرونىنان باستاعان. بۇل قازىرگى باعام بويىنشا شامامەن 47 مىڭ تەڭگەگە تەڭ.
حورسەنستەگى كەزدەسۋ دانيادا ۇزاق ۇزىلىستەن كەيىن وتەتىن ماڭىزدى تيتۋلدىق ايقاستاردىڭ ءبىرى بولماق. بۇعان دەيىن ەلدە مۇنداي دەڭگەيدەگى چەمپيوندىق جەكپە-جەك 2012-جىلعى جەلتوقساندا ۇيىمداستىرىلعان. سول كەزدە ميككەل كەسسلەر حورسەنستە بريتاندىق برايان مەدجيدى نوكاۋتقا ءتۇسىرىپ، WBA تۇجىرىمى بويىنشا چەمپيوندىق بەلبەۋىن قورعاعان.
جانىبەك ءالىمحان ۇلى كاسىپقوي بوكستا وسى ۋاقىتقا دەيىن 17 رەت جەڭىسكە جەتىپ، ونىڭ 12 ءسىن نوكاۋتپەن اياقتاعان. ال ياكوب بانكتىڭ ەنشىسىندە 20 جەڭىس بار، ونىڭ 11 ءى مەرزىمىنەن بۇرىن تىركەلگەن. ەكى بوكسشى دا ازىرگە جەڭىلىستىڭ نە ەكەنىن بىلمەيدى.
قازاقستاندىق بىلعارى قولعاپ شەبەرى سوڭعى كەزدەسۋىن 2025-جىلعى 5-ساۋىردە وتكىزىپ، فرانسۋز انۋەل نگاميسسەنگەنى نوكاۋتپەن جەڭگەن. ال ياكوب بانك 2026-جىلى ءۇش جەكپە-جەككە قاتىسقان. ول سكۋ́لل مەن ناميبيالىق ندجولونيمونى نوكاۋتپەن ۇتىپ، پولياك پاۆەل اۆگۋستىنيكتى تورەشىلەردىڭ ءبىراۋىزدان شىعارعان شەشىمىمەن جەڭدى.
ءالىمحان ۇلى ءۇشىن الداعى كەزدەسۋ كاسىپقوي مانسابىنداعى سۋپەرورتا سالماقتاعى العاشقى جەكپە-جەك بولماق. بۇعان دەيىن ول ورتا سالماقتا IBF جانە WBO تۇجىرىمدارى بويىنشا چەمپيوندىق بەلبەۋلەردى يەلەنگەن. اۋەسقوي بوكستا دا قازاقستاندىق سپورتشى بۇل سالماقتا تابىسقا جەتكەن: 2013-جىلى الەم چەمپيوناتىندا، 2014-جىلى ازيا ويىندارىندا 75 كەلىگە دەيىنگى سالماقتا التىن مەدال جەڭىپ العان.