جاياۋ مۇسا بايجان ۇلى ولەڭدەرى
.جاياۋ مۇسانىڭ «اق سيسا»، «ساۋلەم قىزدار»، «ۇلى تاۋ» سەكىلدى تۋىندىلارى بەرىلدى
اق سيسا
اق سيسا،قىزىل سيسا، سيسا، سيسا،
جاراسار قامزول سۇلۋ، بەلىن قيسا.
شورماننىڭ مۇستاپاسى اتىمدى الىپ،
اتاندىم سول سەبەپتەن جاياۋ مۇسا.
اق سيسا، قىزىل سيسا، سيسا، سيسا،
جۇرمەيدى كىمدەر جاياۋ، زورلىق قىلسا
جيىلىپ ورىس، قازاق قاشقىن دەيدى،
كورەرمىن اقىر ءبىر كۇن تۋسا.
مەن ايتسام، پاراڭدى ايتتىم، ءتىلىم ۇزىن،
كيگەنىم ۇستىمدەگى ءبارى قىزىل.
جىلانسىڭ ەكى باستى ەل جالماعان،
قويمايمىن، نە قىلساڭدا، ايتار ءسوزىم.
ارىستان ايعا شاپتى، اياق سىندى،
جەمقورلار جولداس قىلدى قارا ءتۇندى
ەل كوز جاسى تيەدى تۇقىمىڭا،
ءادىل ۇلىق قۋالار وڭدى-سولدى.
ون ەكى جىل ايدادىڭ توبىل جاققا،
ەم بولماس باستان باعىڭ تايار شاقتا،
دۋانباسى مەن ءوزىم دەمە، مۇسا،
بالاڭ كەتسىن توز-توز بوپ ءار تاراپقا.
اي، مۇسا، سەن - بيدايىق، مەن - ءبىر تورعاي،
جۇرەرمىز، ءتىرى بولساق، وينا-ويناي.
پارانى مۇنان بىلاي توقتات، مۇسا،
ناشاردىڭ جون تەرىسىن ءوزىڭ سويماي.
قۇتقار دەپ جالىنبايمىن ساعان، مۇسا،
بوساتپايسىڭ، ءاي، مۇسا، قارنىڭ تويماي.
بەرەرىم جوق، ەڭبەكپەن كۇندى كورگەن،
اداممىن جالعىز جۇرگەن، بەدنياك شورناي.
جانىما باتقاندىقتان اشىنامىن،
مەن نەگە جاياۋمىن دەپ باسىلامىن
مالىم جوق شورمان ايداپ الاتۇعىن،
قۋلىعىن مۇستاپانىڭ پاش قىلامىن.
ساۋلەم قىزدار
بارادى ۇركەر اۋىپ جازعا تامان،
جۇگىردىم مىلتىق الىپ قازعا تامان.
بۋىلىپ قول-اياعىم جاتسامداعى،
دومالاپ بارا جاتام قىزعا تامان.
قارشىعا قىران بولسا، تىرنا الادى،
جەل سوقسا، ۇزىن اعاش ىرعالادى.
قۇربىلار، جاستىعىڭدا وينا دا كۇل،
قىزىقتان ويناماعان قۇر قالادى.
بۇلت باسىپ ايدىڭ كوزىن تورلادى ما،
اي، ساۋلەم، كوڭىلدەگى بولمادى ما
اركىمنىڭ ىقتيارى وزىڭدە عوي،
سۇيمەسەڭ ، سەنى بىرەۋ زورلادى ما
ۇلى تاۋ
تۋعان جەرىم باياناۋىل،
كەيدە تىنىق، كەيدە داۋىل.
ۇلى تاۋدىڭ قويناۋىندا
مەكەن ەتكەن ءبىزدىڭ اۋىل.
ارتتا قالدى بايان تاۋىم،
جەر اۋدارتتى اتا جاۋىم.
قانشا قىسىم كورسەتسە دە،
ءومىر بويى بىتپەس داۋىم.