روبوتتى ءارتۇرلى جەردە ورنالاسقان دارىگەرلەر قاشىقتان باسقارعان، دەپ حابارلايدى Kazinform Kyodo اگەنتتىگىنە سىلتەمە جاساپ.
حيروساكي ۋنيۆەرسيتەتى مەن جاپون حيرۋرگيالىق قوعامىنىڭ حابارلاۋىنشا، جاڭا ءتاسىل دارىگەرلەردىڭ جەتىسپەۋشىلىگى مەن مەديتسينا ماماندارىنىڭ ايماقتار بويىنشا بىركەلكى بولىنبەۋى ماسەلەسىن شەشۋگە كومەكتەسەدى.
وپەراتسيالاردى حيروساكي ۋنيۆەرسيتەتىنىڭ اۋرۋحاناسى مەن سۋگارۋ اۋرۋحاناسىنىڭ ماماندارى جۇرگىزدى. ەكى مەديتسينالىق مەكەمە دە جاپونيانىڭ سولتۇستىك- شىعىسىنداعى اوموري پرەفەكتۋراسىندا ورنالاسقان.
وتا جاساۋ كەزىندە حيرۋرگتاردىڭ ءبىرى جاپونيالىق Medicaroid كومپانياسى قۇراستىرعان Hinotori روبوتىن تىكەلەي باسقارسا، ەكىنشى مامان باسقا جەردەن قاشىقتان قوسىلىپ، روبوتتىڭ كومەگىمەن ارىپتەسىنە قولداۋ كورسەتكەن.
حيروساكي ۋنيۆەرسيتەتى مەن جاپونيا حيرۋرگيالىق قوعامىنىڭ مالىمەتىنشە، بۇل - جاپونيا تاريحىندا حيرۋرگيالىق روبوتتىڭ كومەگىمەن ءارتۇرلى جەردە وتىرعان دارىگەرلەر بىرلەسىپ وتا جاساعان العاشقى كلينيكالىق جاعداي.
جوسپار بويىنشا، ناۋرىزعا دەيىن ءادىستىڭ قاۋىپسىزدىگىن تەكسەرۋ ءۇشىن تاعى بىرنەشە وتا جاسالادى. ودان كەيىن ۇيىمداستىرۋشىلار قاجەتتى جابدىقتاردى قولدانۋعا رۇقسات الىپ، قاشىقتان روبوت ارقىلى جاسالاتىن وتالاردى ۇلتتىق مەديتسينالىق ساقتاندىرۋ جۇيەسىنە ەنگىزۋگە كۇش سالماق.
- ءبىزدىڭ باستى ماقساتىمىز - شالعاي وڭىرلەردەگى ناۋقاستاردىڭ دا ساپالى حيرۋرگيالىق كومەك الۋىنا مۇمكىندىك جاساۋ،-دەدى توكاي ۋنيۆەرسيتەتىنىڭ پروفەسسورى، جاپونيا حيرۋرگيالىق قوعامىنىڭ قاشىقتان حيرۋرگيانى دامىتۋ كوميتەتىنىڭ ءتوراعاسى ماساكي موري.
ونىڭ سوزىنشە، قاشىقتان باسقارىلاتىن روبوت ارقىلى وتا جاساۋ تەحنولوگياسىن شامامەن ەكى جىلدان كەيىن كەڭىنەن قولدانۋ جوسپارلانىپ وتىر.
حيروساكي ۋنيۆەرسيتەتى مەن جاپونيا حيرۋرگيالىق قوعامى قاشىقتان وتا جاساۋ ءادىسىن بۇكىل ەلگە ەنگىزۋدى جوسپارلاپ وتىر. بۇل ناۋقاستارعا تۇرعىلىقتى جەرىنە جاقىن جەردە قاجەتتى حيرۋرگيالىق كومەك الۋعا، سونداي-اق باسقا وڭىرلەرگە بارىپ ەمدەلۋگە كەتەتىن ۋاقىت پەن شىعىندى قىسقارتۋعا كومەكتەسەدى.
بۇعان دەيىن جاپونيانىڭ ءوزىن-ءوزى قورعاۋ كۇشتەرى اسكەر تاپشىلىعىنا بايلانىستى ج ي- مەن جاساقتالعان ادام ءتارىزدى روبوتتاردى قورعانىس سالاسىندا قولدانۋدى زەرتتەپ جاتقانى تۋرالى حابارلاعان بولاتىنبىز.