سوڭعى مالىمەت بويىنشا كاناگاۆا پرەفەكتۋراسىندا ءبىر ايەل قازا تاپقان، تاعى بىرنەشە ادام ءىز-ءتۇزسىز جوعالعان، دەپ حابارلايدى Reuters.
ەڭ كۇردەلى جاعداي توكيو مەن وعان ىرگەلەس پرەفەكتۋرالار ورنالاسقان كانتو وڭىرىندە قالىپتاستى. ۇزاق ۋاقىت جاۋعان نوسەردىڭ سالدارىنان لاي كوشكىنى ءجۇرىپ، ۇيلەر مەن جولداردى سۋ باستى.
كاناگاۆا پرەفەكتۋراسىنىڭ يوكوسۋكا قالاسىندا لاي كوشكىنى تۇرعىن ءۇيدى باسىپ قالدى. قۇتقارۋشىلار ءۇيىندى استىنان 64 جاستاعى ايەلدى الىپ شىققانىمەن، ونى امان الىپ قالۋ مۇمكىن بولمادى. كورشىلەس ميۋرا قالاسىندا لاي كوشكىنى ەكى قاباتتى تۇرعىن ءۇيدى ءىشىنارا باسىپ قالعان. قازىر وندا ىزدەۋ-قۇتقارۋ جۇمىستارى جالعاسىپ جاتىر.
Kyodo اگەنتتىگىنىڭ مالىمەتىنشە، لاي كوشكىنىنەن ءىز- ءتۇزسىز جوعالعاندار سانى ءتورت ادامعا جەتتى.
تابيعي اپات تيبا پرەفەكتۋراسىنا دا ايتارلىقتاي زيان كەلتىردى. وندا تۇرعىن ۇيلەر مەن كوشەلەردى سۋ باستى. ال سودەگاۋرا قالاسىندا جولعا تۇسكەن توپىراق ۇيىندىسىمەن كولىگى سوقتىعىسقان ايەل جاراقات الدى.
جەكەلەگەن اۋدانداردا جاۋىن-شاشىن مولشەرى رەكوردتىق دەڭگەيگە جەتتى. يدزۋ- وسيما ارالىندا تاۋلىك ىشىندە 670 م م-دەن استام جاڭبىر جاۋدى. تيبا پرەفەكتۋراسىنىڭ ءبىرقاتار قالاسىندا تاۋلىكتىك جاۋىن-شاشىن مولشەرى بويىنشا تاريحي رەكورد جاڭاردى. كيميتسۋدا 377,5 م م، فۋناباسيدە 341,5 م م، يتيحارادا 328 م م جاۋىن-شاشىن ءتۇستى.
جاپونيانىڭ مەتەورولوگيالىق اگەنتتىگى لاي كوشكىنى، سۋ تاسقىنى، وزەندەردىڭ ارناسىنان شىعۋى، قاتتى جەل جانە بيىك تولقىن قاۋپى تۋرالى ەسكەرتۋ جاريالادى.
بۇعان دەيىن يدزۋ ارالدارىنداعى وسيما قالاسىندا لاي كوشكىنى قاۋپىنە بايلانىستى ەسكەرتۋدىڭ ەڭ جوعارى، بەسىنشى دەڭگەيى جاريالانعان بولاتىن. سينوپتيكتەر سونداي-اق قىسقا ۋاقىتتا سۋ تاسقىنىن تۋدىرۋى مۇمكىن قاتتى جاۋىن-شاشىننىڭ سىزىقتىق ايماقتارى قالىپتاسۋى ىقتيمال ەكەنىن ەسكەرتتى.
مەتەورولوگتاردىڭ مالىمەتىنشە، 21-قىركۇيەك كەشكە تايفۋننىڭ ورتالىعى تيبا پرەفەكتۋراسىنىڭ جاعالاۋىنان وڭتۇستىك-شىعىسقا قاراي ورنالاسىپ، سولتۇستىك-شىعىس باعىتتا جىلجىعان. تايفۋن ورتالىعىنداعى قىسىم شامامەن 960 گەكتوپاسكال بولدى. جەلدىڭ ماكسيمالدى جىلدامدىعى 40 م/س- قا، ەكپىنى 55 م/س-قا جەتتى.
قولايسىز اۋا رايى كولىك قاتىناسىنا دا ايتارلىقتاي اسەر ەتتى. Japan Airlines اۋە كومپانياسى ىشكى باعىتتار بويىنشا شامامەن 120 رەيستى، All Nippon Airways شامامەن 140 رەيستى توقتاتتى. تيبا مەن يباراكي پرەفەكتۋرالارىندا جانە توكيونىڭ باتىس بولىگىندە كەيبىر تەمىرجول جەلىلەرىنىڭ قوزعالىسى تولىق نەمەسە ءىشىنارا توقتاتىلدى.
ەسكە سالايىق، بۇعان دەيىن جاپونياعا تاعى دا تايفۋن جاقىنداپ كەلە جاتقانى تۋرالى جازدىق.