جاپونياداعى ازيا ويىندارىنىڭ سوڭعى سپورتتىق باعدارلاماسى بەكىتىلدى

استانا. KAZINFORM - ازيا وليمپيادالىق كەڭەسىنىڭ (ا و ك) اتقارۋشى كوميتەتى 2026-جىلدىڭ 19-قىركۇيەگى مەن 4-قازانى ارالىعىندا جاپونيانىڭ ايتي جانە ناگويا قالالارىندا وتەتىن 20-ازيا ويىندارىنىڭ سوڭعى سپورتتىق باعدارلاماسىن بەكىتتى.

ۇلتتىق وليمپيادا كوميتەتى باسپا ءسوز قىزمەتىنىڭ مالىمەتىنشە، بۇل شەشىم ۇيىمنىڭ ءبىرىنشى ۆيتسە-پرەزيدەنتى تيموتي فوك ءتوراعالىق ەتكەن اتقارۋشى كوميتەتتىڭ ونلاين وتىرىسىندا ءبىراۋىزدان قابىلداندى.

- ويىندار باعدارلاماسىنا 68 ديستسيپلينانى قامتيتىن 41 سپورت ءتۇرى كىردى. سپورتشىلار جالپى 460 مەدال جيىنتىعىن ساراپقا سالادى. ونىڭ ىشىندە ەرلەر اراسىندا – 217، ايەلدەر اراسىندا - 204 جانە ارالاس جارىستاردا - 39 مەدال جيىنتىعى ويناتىلادى، - دەلىنگەن حابارلامادا.

باعدارلاماعا جەڭىل اتلەتيكا، ءجۇزۋ، فۋتبول، تەننيس سياقتى وليمپيادالىق سپورت تۇرلەرىمەن قاتار، ايماققا ءتان نەمەسە جاڭا ديستسيپلينالار دا ەنگىزىلدى. ولاردىڭ قاتارىندا كيبەرسپورت، برەيكينگ، سەپاكتاكراۋ، ۋشۋ جانە كاباددي بار. سونداي-اق جارىستارعا بوكس، دزيۋدو، رەگبي-7، اۋىر اتلەتيكا، قازىرگى بەسسايىس، سەمسەرلەسۋ، سكەيتبوردينگ، ەسكەك ەسۋ، جەلكەندى سپورت جانە جەكپە-جەك ونەرلەرى (دجيۋ-دجيتسۋ، كۋراش، ەرەجەسىز جەكپە-جەك) سياقتى سپورت تۇرلەرى دە ەندى.

ايتا كەتەيىك، جاپونيا ازيا ويىندارىن ءۇشىنشى رەت قابىلدايدى. بۇعان دەيىن بۇل ەل 1958-جىلى (توكيو) جانە 1994-جىلى (حيروسيما) وتكەن ويىنداردىڭ قوجايىنى بولعان ەدى.

بۇعان دەيىن ارالاس جەكپە-جەك رەسمي ازيا ويىندارىنىڭ باعدارلاماسىنا ەنگەنىن جازعانبىز.