جاپونيادا ەر ادام سۇيىكتىسى وزىنەن 25 جاس ۇلكەن ەكەنىن توي الدىندا عانا بىلگەن

استانا. قازاقپارات - ول ءوزىنىڭ شىن جاسىن ايتسا، يوشيتاكادان ايىرىلىپ قالامىن دەپ قورىققان. جاپونيادا ەر ادام 7 جىل بويى سۇيىكتىسى وزىنەن 25 جىل ۇلكەن ەكەنىن بىلمەگەن، تەك ۇيلەنۋ الدىندا عانا ونىڭ ناقتى جاسى بەلگىلى بولعان، دەپ جازدى scmp.com.

يوشيتاكا ەسىمدى 40 جاستاعى ەر ادام مەن ونىڭ 65 جاستاعى ايەلى اكيدىڭ YouTube جەلىسىندە 18000 جازىلۋشىسى بار. ولار العاش رەت اكي باسقاراتىن جاپون ستيلىندەگى باردا تانىسقان، دەپ حابارلايدى جاپوندىق Bunshun Online مەديا پورتالى.

وسى ۋاقىتتا يوشيتاكا اجىراسقان جانە اكيدىڭ سۇلۋلىعىنا قاتتى قىزىعىپ، ونى ءبىر كورگەننەن ۇناتىپ قالعان.

يوشيتاكا Bunshun Online-عا بەرگەن سۇحباتىندا: «ونىمەن سويلەسكەندە، ەكەۋمىزدىڭ دە ءساتسىز نەكەنى باستان وتكەرگەنىمىزدى، بالالاردى جالعىز تاربيەلەپ جۇرگەنىمىزدى جانە كوپتەگەن ورتاق قىزىعۋشىلىقتارىمىزدىڭ بار ەكەنىن بايقادىم» دەپ ايتقان.

ەرلى-زايىپتىلار ءبىر كورگەننەن ءبىر-بىرىنە عاشىق بولىپ، جۇپ بولۋدى شەشەدى، الايدا اكي قارىم-قاتىناسقا بايلانىستى ءاردايىم الاڭداپ ءجۇرىپتى. اكي ول كەزدە ءوزىن 44 جاستا دەپ تانىستىرىپ جۇرگەنىن مويىندادى. ول ءوزىنىڭ شىن جاسىن ايتسا، يوشيتاكادان ايىرىلىپ قالامىن دەپ قورىققان. كوڭىلدى مىنەزى مەن جاقسى كۇتىمىنىڭ ارقاسىندا اكي جاس كورىنگەن. يوشيتاكا ولاردىڭ جاس ايىرماشىلىعى تەك 15  جىل دەپ ويلاعان، ءبىراق شىن مانىندە ونىڭ ومىرلىك سەرىگى ودان 25 جاس ۇلكەن بولىپ شىققان.

بۇل وقيعا الەۋمەتتىك جەلىلەردە قىزىعۋ تالقىلانعان. پىكىر جازعانداردىڭ ءبىرى: «ماحاببات ادامداردى جاس ايىرماشىلىعىن ەلەمەۋگە ءماجبۇر ەتەدى. ولارعا باقىت تىلەيمىن» دەپ جازدى. تاعى بىرەۋ: «اكي مەنىڭ انامنان ۇلكەن، ءبىراق ول مەنەن دە جاس كورىنەدى» دەيدى.