جاپونيادا ەكى ارال ءۇش كۇننىڭ ىشىندە ءبىر-بىرىنەن 10 سانتيمەترگە الىستاپ كەتتى

استانا. KAZINFORM - جاپون زەرتتەۋشىسى ەلدىڭ وڭتۇستىك- باتىسىنداعى ەكى شاعىن ارال ءۇش كۇن ىشىندە ءبىر- بىرىنەن شامامەن 10 سانتيمەترگە الىستاپ كەتكەنىن انىقتادى.

بۇل تۋرالى Kazinform اگەنتتىگى NHK World-Japan ارناسىنا سىلتەمە جاساپ حابارلادى.

سوڭعى اپتالاردا كاگوسيما پرەفەكتۋراسىنداعى توكارا ارالدار توبى ماڭىندا سەيسميكالىق بەلسەندىلىك كۇشەيىپ وتىر.

توحوكۋ ۋنيۆەرسيتەتىنىڭ جاراتىلىس تانۋ عىلىمدارى جوعارى مەكتەبىنىڭ پروفەسسورى وتا يۋساكۋ جەر قىرتىسىنىڭ قوزعالىسىن زەرتتەي كەلە، 2-شىلدەدە بولعان ماگنيتۋداسى 5,6 جەر سىلكىنىسىنەن كەيىن ءۇش كۇن ىشىندە كوداكارادزيما ارالى سولتۇستىك- باتىسقا قاراي 6 س م، ال تاكارادزيما ارالى وڭتۇستىككە قاراي 3,5 س م جىلجىعانىن انىقتاعان.

بۇعان دەيىن ەكى ارال دا سولتۇستىك-شىعىس باعىتىندا قوزعالىپ كەلگەن.

پروفەسسوردىڭ ايتۋىنشا، مۇنداي قاراما-قارسى باعىتتاعى قوزعالىس العاش رەت تىركەلىپ وتىر.

وتا يۋساكۋ بۇل ىعىسۋعا جەر سىلكىنىسىنىڭ ءوزى سەبەپ بولماۋى مۇمكىن ەكەنىن ايتتى، سەبەبى جەر سىلكىنىسىنىڭ قۋاتى مەن ەپيتسەنتردىڭ ارالداردان الشاقتىعى ونداي وزگەرىسكە اكەلەتىندەي كۇشتى بولماعان.

سونداي-اق پروفەسسور قازىرگى جاعدايدا بۇل قۇبىلىس ءىرى جەر سىلكىنىسىنە اكەلە مە، جوق پا - ازىرگە ناقتى ايتۋ قيىن ەكەنىن اتاپ ءوتتى.

ول بۇل قۇبىلىستىڭ سەبەبىن ءتۇسىنۋ ءۇشىن وتكەن كەزەڭدەردەگى گەودەزيالىق دەرەكتەردى زەرتتەمەك.

ايتا كەتەيىك، بۇعان دەيىن جاپونيادا ءبىر جارىم اپتا ىشىندە 900 گە جۋىق جەر سىلكىنىسى بولعان ەدى.