جاپونيادا دۇنيەجۇزىلىك EXPO 2025 كورمەسى ءوتىپ جاتىر
استانا. KAZINFORM - وساكا قالاسىندا 158 ەل مەن 9 حالىقارالىق ۇيىمدى بىرىكتىرگەن اۋقىمدى حالىقارالىق وقيعا - دۇنيەجۇزىلىك EXPO 2025 كورمەسى باستالدى.
كورمە 2025 -جىلعى 13 -ءساۋىر مەن 13- قازان ارالىعىندا وتەدى. ءىس-شارانى وتكىزۋ ءۇشىن جاساندى يۋمەشيما ارالى تاڭدالدى. كورمەنىڭ باستى تاقىرىبى - «ءبىزدىڭ ءومىرىمىز ءۇشىن بولاشاق قوعامىن قۇرۋ». ول ءۇش باعىت ارقىلى اشىلادى: «ءومىردى قۇتقارۋ»، «مۇمكىندىكتەردى كەڭەيتۋ» جانە «ءومىردى بىرىكتىرۋ».
كورمەنىڭ رەسمي راسىمىنە جاپونيا يمپەراتورى نارۋحيتو مەن پرەمەر- مينيستر سيگەرۋ يسيبا قاتىستى. قازاقستان دەلەگاتسياسىن قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى ارمان شاكقاليەۆ باسقاردى.
ۇلتتىق پاۆيلون وڭتۇستىك كورەيا، گەرمانيا، ليۋكسەمبۋرگ، نەپال، ازەربايجان، يران، موناكو جانە تۇركيا سياقتى ەلدەردىڭ پاۆيلوندارىنا جاقىن ورنالاسقان «ءومىردى بىرىكتىرۋ» تاقىرىپتىق كلاستەرىندە ورنالاسقان.
EXPO 2025 كورمەسىندەگى قازاقستان پاۆيلونى - بۇل سيفرلىق عالام، وندا جاڭا تەحنولوگيالار ەلدىڭ مادەنيەتى، تاريحى مەن بولاشاعى كورىنىس تابادى.
شاڭىراق سيمۆولىنا نەگىزدەلگەن تۇجىرىمداما ينتەراكتيۆتى ايماقتاردى بىرىكتىرەدى. وندا كوپقىرلى مۇرانى اشاتىن 3D مەپپينگتەن باستاپ، كەلۋشىلەردىڭ جۇزدەرى ءبىرتۇتاس ۆيزۋالدى كەنەپكە بىرىكتىرىلگەن يممەرسيۆتى پروەكسيالىق شوۋعا دەيىن بار. ەكسپوزيتسيانىڭ ءاربىر ەلەمەنتى - قازاقستاننىڭ ەكولوگيا، تۋريزم، يننوۆاتسيا جانە تۇراقتى دامۋ سالاسىنداعى الەۋەتىن زەرتتەۋگە تارتاتىن قوناقپەن ديالوگ ىسپەتتەس.
ەلدىڭ ينۆەستيتسيالىق جانە ەكونوميكالىق الەۋەتىن كورسەتۋگە ەرەكشە نازار اۋدارىلدى: نەگىزگى سالالار، تابيعي رەسۋرستار، تۋريستىك جانە يننوۆاتسيالىق الەۋەت، سونداي-اق «جاسىل» ەنەرگەتيكا جانە تۇراقتى دامۋ سالاسىنداعى جەتىستىكتەر ۇسىنىلدى. پاۆيلون ديالوگ، مادەني الماسۋ جانە جاھاندىق دەڭگەيدە جاڭا سەرىكتەستىكتەر ورناتۋ ءۇشىن زاماناۋي الاڭعا اينالۋعا ارنالعان.
سونداي-اق پاۆيلوندا قازاقستاندا جاسالعان سەرپىندى مەديتسينالىق شەشىم - «Heart Center Foundation» قورى ازىرلەگەن «ALEM» (Astana life Ex-situ Machine) قۇرىلعىسى ۇسىنىلدى. بۇل يننوۆاتسيالىق دامۋ دونورلىق ورگانداردىڭ دەنەدەن تىس ومىرشەڭدىگىن ساقتاۋعا، ولارعا دياگنوستيكا وتكىزۋگە جانە ەمدەۋگە، سونىڭ ىشىندە ونكولوگيالىق اۋرۋلارعا دا، سونىمەن قاتار امپۋتاتسيالانعان اعزانى رەپلانتاتسياعا دەيىن ساقتاۋعا مۇمكىندىك بەرەدى.
قازاق حالقىنىڭ ءداستۇرى مەن قوناقجايلىلىق مادەنيەتىنە ساي اشىلۋ كۇنى پاۆيلونىمىزدا ۇلتتىق تاعامدار ۇسىنىلدى.
- EXPO كورمەلەرى جەتىستىكتەردى ۇسىنۋ مۇمكىندىگى عانا ەمەس، سونىمەن قاتار حالىقارالىق بايلانىستاردى نىعايتۋ، ەكونوميكالىق جانە مادەني ديالوگتى دامىتۋ ءۇشىن ماڭىزدى الاڭ بولىپ تابىلادى، - دەلىنگەن «QazExpoCongress» ۇ ك» ا ق تاراتقان حابارلامادا.
وسىعان دەيىن ورتالىق ازيا - ەۋروپا وداعى سامميتىنە قاتىسۋشىلار Aral Culture Summit كورمەسىن تاماشالاعانىن حابارلادىق.