جاپونيا پرەمەر- ءمينيسترى ورتالىق ازياعا 50 جاپوندىق كومپانيا وكىلىن الىپ كەلەدى

استانا. KAZINFORM -جاپونيا پرەمەر-ءمينيسترى فۋميو كيشيدا ءتۇرلى سالاداعى 50 كومپانيادان تۇراتىن ۇلكەن دەلەگاتسيامەن ورتا ازياعا ساپارلايدى. بۇل تۋرالى NHK World JAPAN باسىلىمى جازدى.

فۋميو كيشيدا قازاقستان مەن وزبەكستانعا كەلەدى، ەكى ەل باسشىلارىمەن كەزدەسەدى، ايماقتىق سامميتكە قاتىسادى جانە باسقا دا كەلىسسوزدەر جۇرگىزەدى.

جاپوندىق كومپانيالار ورتالىق ازيا كومپانيالارىمەن جاڭا كەلىسىمشارتتار جاساۋى كۇتىلۋدە. ىنتىماقتاستىقتىڭ نەگىزگى باعىتتارى دەكاربونيزاتسيانى، سيفرلىق دەنساۋلىق ساقتاۋ قىزمەتتەرىن جانە باسقا دا وزىق تەحنولوگيالاردى ەنگىزۋ بولىپ تابىلادى. جاپونيا جاپوندىق كومپانيالاردى ورتالىق ازياعا بەلسەندى ينۆەستيتسيالاۋعا ىنتالاندىرۋدى جوسپارلاپ وتىر. 300 ميلليارد يەن كولەمىندە بەس جىلدىق نەسيە جەلىسى اشىلادى.

توكيو ستراتەگيالىق پايدالى قازبالارعا باي ايماققا جاھاندىق قىزىعۋشىلىقتىڭ ايتارلىقتاي ارتىپ جاتقان كەزدە ورتا ازياداعى ىقپالىن كۇشەيتۋدى كوزدەيدى.

ايتا كەتەيىك، 8-10-تامىزدا استانادا ورتالىق ازيا ەلدەرىنىڭ باسشىلارى كەزدەسەدى. وندا پرەزيدەنتتەردىڭ جىل سايىنعى كونسۋلتاتيۆتىك كەزدەسۋى مەن «ورتالىق ازيا+جاپونيا» ءسامميتى وتەدى.

بۇعان دەيىن جاپونيا ورتالىق ازياعا ەكونوميكالىق كومەك پاكەتىن جاريالايتىنىن حابارلاعان ەدىك.