جاپونيا پرەمەر-ءمينيسترى فۋميو كيشيدا قازاقستانعا كەلەدى
استانا. KAZINFORM - جاپونيا مينيسترلەر كابينەتىنىڭ باس حاتشىسى ەسيماسا حاياسي بۇگىن باسپا ءسوز ءماسليحاتىندا پرەمەر-مينيستر فۋميو كيشيدا تامىز ايىندا ورتالىق ازيانىڭ بەس ەلىمەن وتەتىن سامميتكە قاتىسۋ ءۇشىن قازاقستانعا كەلەتىنىن حابارلادى.
جاپونيانىڭ Kyodo News حابارلاۋىنشا، ەسيماسا حاياسي جاپونيانىڭ 2004-جىلى ورتالىق ازيانىڭ بەس ەلىمەن سىرتقى ىستەر مينيسترلەرىنىڭ كەزدەسۋى مەحانيزمىن ىسكە قوسقانىنا 20 جىل وتكەنىن اتاپ ءوتتى. ەسيماسا حاياسي جاپونيانىڭ ورتالىق ازيانىڭ بەس ەلىمەن قارىم-قاتىناسى تۋرالى ايتتى.
«دوستىق پەن ءوزارا سەنىمگە نەگىزدەلگەن ارىپتەستىك پەن ءوزارا ءتيىمدى ىنتىماقتاستىق تەرەڭدەي ءتۇستى»، - دەيدى ول.
ەسيماسا حاياسي سونداي-اق رەسەيدىڭ ۋكرايناعا اسكەري شابۋىلىن ەسكەرە وتىرىپ، ەركىن جانە اشىق زاڭ ۇستەمدىگىنە نەگىزدەلگەن حالىقارالىق ءتارتىپتى ساقتاۋ جانە نىعايتۋ ءۇشىن ورتالىق ازيا ەلدەرىمەن ىنتىماقتاستىق بۇرىنعىدان دا ماڭىزدى ەكەنىن ايتتى.