جاپوندىق مۇناي يمپورتىنىڭ %90 دان استامى تاياۋ شىعىستان كەلىپ وتىر. الايدا ايماقتاعى قاقتىعىس سالدارىنان ورمۋز بۇعازى ءىس جۇزىندە جابىلۋى اياسىندا جەتكىزىلىم تۇراقتىلىعىنا قاتىستى الاڭداۋشىلىق ارتىپ كەلەدى. سوندىقتان جاپونيا ءوز كوزدەرىن ءارتاراپتاندىرۋدى كوزدەپ وتىر.
INPEX-تىڭ كاسپيدەگى ءىرى كەن ورىندارىندا، مىسالى، قازاقستاندا ونىمدىلىگى تاۋلىگىنە 430 مىڭ باررەلدى قۇرايتىن قاشاعان كەن ورنىندا جانە ازەربايجاندا تاۋلىگىنە 350 مىڭ باررەل وندىرەتىن ACG كەن ورنىندا ۇلەسى بار. كەن ورىندارىنىڭ ەكەۋى دە قاسيەتتەرى تاياۋ شىعىستا وندىرىلەتىنگە ۇقساس دەپ ايتىلاتىن ورتاشا جانە جەڭىل شيكى مۇناي وندىرەدى.
باعىتتار افريكاداعى ءۇمىت ءمۇيىسىن اينالىپ قىزىل جانە جەرورتا تەڭىزدەرى ارقىلى ءوتۋى مۇمكىن. قازاقستان مەن ازەربايجاننان جەتكىزۋ 25 تەن 55 كۇنگە دەيىن سوزىلادى دەپ كۇتىلىپ وتىر. بۇل جەتكىزىلىم مەرزىمى شامامەن 20 كۇنگە سوزىلاتىن ورمۋز بۇعازى ارقىلى وتەتىن جولدان ەكى ەسەدەن استام كوپ. بۇل ءوز كەزەگىندە كولىك شىعىندارىنىڭ ارتۋىنا اكەلۋى مۇمكىن.
بۇدان باسقا، جاپونيا ۇكىمەتى مەن مۇناي كومپانيالارى وڭتۇستىك امەريكادان مۇناي ساتىپ الۋ مۇمكىندىگىن زەرتتەپ جاتىر. سونىمەن قاتار، ەل جاپونيانىڭ تاياۋ شىعىستان تىس جەرلەردەگى ەڭ ءىرى يمپورت كوزى بولىپ تابىلاتىن ا ق ش-تان جەتكىزىلىمدەردى ارتتىرۋدى كوزدەپ وتىر. 2025 -جىلى جاپونيانىڭ شيكى مۇناي يمپورتىنىڭ %3,8 ى ا ق ش-قا تيەسىلى بولعان.
ەسكە سالايىق، جاپونيا 16-ناۋرىزدان باستاپ تاياۋ شىعىستاعى قاقتىعىس سالدارىنان بەنزين مەن وزگە مۇناي ونىمدەرى باعاسىنىڭ كۇرت ءوسۋ قاۋپىنە بايلانىستى مۇناي قورىن قىسقارتۋدى باستاعان.
بۇل - جاپونيانىڭ 1978 -جىلدان بەرى العاش رەت حالىقارالىق ۇيلەستىرۋسىز، ءوز بەتىنشە مەملەكەتتىك مۇناي قورىن بوساتۋى بولىپ وتىر.