جاپوندىقتار جاڭبىر سۋىن قۇرىلىسقا پايدالانۋدا

استانا. قازاقپارات - توكيودا جاڭبىر سۋىن جيناۋ ءۇشىن جەراستى تۋننەلىن قايتا كەڭەيتۋ جۇمىستارى باستالدى، دەپ حابارلايدى 24kz.

قۇرىلىس قالاداعى بيىك عيماراتتار مەن تىعىز كوشەلەر اراسىندا جۇرگىزىلۋدە. بۇل زاماناۋي سۋ اعىزۋ جۇيەسى تۇرعىنداردى جويقىن سۋ تاسقىنى مەن تابيعي اپاتتاردان قورعاۋعا ارنالعان.

جاپونيا استاناسىندا جەراستى تۋننەلىن كەڭەيتۋ جۇمىستارىنا جاڭبىر سۋى پايدالانۋدا. بۇل قۇرىلىس مەگاپوليستى وزەندەردىڭ تاسۋىنان جانە تايفۋنداردان بولاتىن ءجيى سۋ تاسقىنىنان قورعاۋعا كومەكتەسەدى. قازىرگى تاڭدا 4,5 شاقىرىمنان استام جەراستى وتكەلى ىسكە قوسىلدى.

ارحيتەكتۋرا بيۋروسىنىڭ مەنەدجەرى شۋنا وتومونىڭ ايتۋىنشا، تۋننەل تابيعاتتىڭ توسىن مىنەزىنە توتەپ بەرە الادى.

شۋنا وتومو، توكيو ساۋلەت بيۋروسىنىڭ مەنەدجەرى:

- جەر تەمپەراتۋراسى 2050 -جىلى 2 گرادۋسقا كوتەرىلگەندە جاۋىن-شاشىن مولشەرى - كە ارتادى دەگەن بولجام بار. مۇنداي قاتتى جاۋىن-شاشىن قالانىڭ ينفراقۇرىلىمىنا ەلەۋلى زيان كەلتىرۋى مۇمكىن. وسىعان بايلانىستى تۇرعىنداردىڭ قاۋىپسىزدىگىن قامتاماسىز ەتۋ ءۇشىن ءبىز شۇعىل الدىن الۋ شارالارىن قابىلداۋدامىز.

سەيتا ەموري، توكيو ۋنيۆەرسيتەتىنىڭ پروفەسسورى:

- جاھاندىق جىلىنۋ ناتيجەسىندە سۋدىڭ بۋلانۋ مولشەرى ارتىپ، جاۋىن-شاشىننىڭ كوبەيۋىنە الىپ كەلەدى. الداعى ۋاقىتتا جەر تەمپەراتۋراسىنىڭ جوعارىلاۋىنا بايلانىستى بۇرىن-سوڭدى بولماعان رەكوردتىق جاۋىن-شاشىن كۇتىلۋدە.

جاڭبىر سۋىن جيناقتايتىن بىرنەشە كوللەكتور بار. سولاردىڭ ەڭ ءىرىسى 20 جىلدان استام ۋاقىت بۇرىن ىسكە قوسىلعان. قۇرىلىسى 13 جىلعا سوزىلعان جوباعا مەملەكەتتىك بيۋدجەتتەن 2 ميلليارد دوللاردان استام قارجى جۇمسالعان. سۋ جينايتىن كوللەكتوردىڭ سىيىمدىلىعى 100 وليمپيادالىق باسسەينگە تەڭ. «جەراستى سارايى» دەپ اتالاتىن بۇل جەر جاپوندىقتار اراسىندا تانىمال. ياعني، جاستاردىڭ تەلەحيكايالار ءتۇسىرىپ، فوتوسەسسيا جاساۋ ءۇشىن ءجيى جينالاتىن سۇيىكتى ورنىنا اينالعان.

يەسيرو ميادزاكي، جوبا مەنەدجەرى:

- جەراستى تۋننەلى سۋ تاسقىنى كەزىندە 1 ميلليارد دوللاردان استام شىعىننىڭ الدىن الۋعا كومەكتەستى. 23 جىل ىشىندە بۇل قۇرىلعى شامامەن 147 رەت پايدالانىلىپ، جىلىنا ورتا ەسەپپەن جەتى رەت قولدانىلدى. بۇل جوبا توكيونىڭ قاۋىپسىزدىگىن قامتاماسىز ەتۋدە ۇلكەن ءرول اتقارادى.

كانتو جازىعىنداعى توكيو قالاسى بەس ءىرى وزەنگە جاقىن ورنالاسقان. ءجيى بولاتىن تايفۋن مەن مول جاۋىن-شاشىننىڭ سالدارىنان مەگاپوليس جىل سايىن «سۋيۋ» ماۋسىمىمەن بەتپە-بەت كەلەدى. بۇل كەزەڭدە قالادا ەكى اي بويى تولاسسىز جاڭبىر جاۋىپ، جەرگىلىكتى وزەندەر ارناسىنان اسىپ، كوپتەگەن پرەفەكتۋرالاردا توتەنشە جاعداي جاريالانىپ تۇرادى.