جاپوندار جىل بويى دەمالماي جۇمىس ىستەيدى
استانا. قازاقپارات - جاز دا تاياپ قالدى. بۇل تۇراقتى جۇمىس ىستەيتىن ادامداردىڭ كوپتەن كۇتكەن ەڭبەك دەمالىسىنا شىعاتىن كەزەڭى. ءبىراق ونىڭ مەرزىمى ءار ەلدىڭ زاڭىنا سايكەس ءارتۇرلى. مىسالى، كۇنشىعىستاعى جاپونيا ۇكىمەتى جىلىنا 10 كۇننەن ارتىق دەمالىس بەرمەيدى.
قۇرلىقتىڭ ارعى جاعىنداعى امەريكادا دا سولاي. جەرگىلىكتى حالىق دەمالىسقا اسىعىپ، اپتىعىپ جەتەدى. ال كەي ەلدە تۇرعىندار، كەرىسىنشە، از جۇمىس ىستەپ، كوپ دەمالادى. ءيا، قاي-قايسىمىز دا جاز شىقسا، ساياحاتتاپ، دەمالىسقا اتتانامىز دەپ قۋانامىز. ءبىزدىڭ ەلدە سولاي. ءبىراق كەي ەلدەردە دەمالىس دەيتىن ۇعىم جاي ءسوز جۇزىندە عانا.
جاپوندار جىل بويى دەمالماي جۇمىس ىستەيدى
جاپونيادا تۇراقتى جۇمىسى بار ادامدار ەڭبەك دەمالىسىنا شىعۋعا اسىقپايدى. مۇنىڭ سەبەبىن ساراپشىلار جۇمىس كۇشىنىڭ تاپشىلىعىمەن بايلانىستىرادى. مۇنان سوڭ ءوزى ازعانتاي كۇن عانا بەرىلەتىن ەڭبەك دەمالىسىن توتەنشە جاعداي تۋىنداعان جاعدايدا پايدالانۋعا ىسىرىپ قويادى. كۇنشىعىس ەلىنىڭ قولدانىستاعى زاڭىنا سايكەس جارتى جىل ۇزدىكسىز جۇمىس ىستەگەن جاپون قىزمەتكەرى جىلىنا 10 كۇنگە عانا دەمالىسقا شىعۋعا قۇقىلى. ونىڭ مەرزىمى ەڭبەك وتىلىنە قاراي وسە بەرەدى. مىسالى، 1,5 جىل جۇمىس ىستەگەن مامانعا تاعى قوسىمشا 1 كۇن قوسىلادى. ياعني 1,5 جىلدا 11 كۇن دەمالسا، 6 جىلدان كەيىن دەمالىس ۇزاقتىعى 20 كۇنگە جەتەدى. ەگەر جۇمىسشى جىل ىشىندە زاڭدى ەڭبەك دەمالىسىن الماسا، ول ەكى جىلدان كەيىن كۇيىپ كەتەدى.
جاپونيادا الەم بويىنشا ەڭبەك دەمالىسىنىڭ كۇندەرى از بولعانىمەن، جۇمىسپەن قامتىلعان حالىقتىڭ جارتىسىنا جۋىعى ءۇزىلىسسىز جۇمىس ىستەپ جۇرگەنىن سەزىنبەيدى. ويتكەنى قىزمەتكەرلەردىڭ 0 ءى زاڭدى دەمالىسىن ءار اي سايىن ءبولىپ-ءبولىپ الادى. كەيىنگى دەرەك وسىنى ايعاقتاپ وتىر.
وڭتۇستىك كورەيادا دەمالىس ەڭبەك وتىلىنە بايلانىستى ەسەپتەلەدى
وڭتۇستىك كورەيادا ەڭبەك دەمالىسىن ۇيىمداستىرۋ زاڭدىلىعى جاپونيا جۇيەسىنە ۇقساس. قىزمەتكەردىڭ ەڭبەك ءوتىلى نەعۇرلىم ارتقان سايىن سوعۇرلىم دەمالىس مەرزىمى ۇزارا بەرەدى. مىسالى، قىزمەتكەردىڭ ەڭبەك ءوتىلى ءبىر جىلدان كەم بولسا، جۇمىس ىستەگەن ءار تولىق اي ءۇشىن 1 كۇندىك تولەنەتىن دەمالىس الا الادى. ال ءبىر جىلدان اسسا، كەلەسى جىلى 15 كۇندىك دەمالىسقا شىعۋعا قۇقىلى. ءبىر وسال تۇسى، قىزمەتكەر ءتيىستى ءۇزىلىستى مەرزىمىندە الماسا، ول كۇيىپ كەتەدى.
امەريكالىقتاردىڭ تەڭ جارتىسى ەڭبەك دەمالىسىنا شىقپايدى
ا ق ش- تا دا قىزمەتكەرلەر جىل بويى دەمالماي جۇمىس ىستەيدى. كەيىنگى زەرتتەۋ كورسەتىپ وتىرعانداي، ءاربىر ءتورتىنشى امەريكالىق ەڭبەك دەمالىسىنا شىقپايدى. ويتكەنى بۇل ەلدە قىزمەتكەردى ەڭبەك دەمالىسىنا جىبەرىپ ءارى وعان ماتەريالدىق اقى تولەيتىن زاڭ اتىمەن جوق. ال جەكە سەكتوردا جۇمىس ىستەيتىن مامان جىلىنا 10 تاۋلىك ەڭبەك دەمالىسىنا شىعا الادى. دەمالىس كۇندەردى قوسىپ بەرۋ جۇمىس بەرۋشىنىڭ ەركىندە. «ءبىراق بۇل قىزمەتكەردىڭ جۇمىستان جالىعىپ، دەپرەسسيالىق كۇيگە تۇسۋىنە يتەرمەلەيدى»، - دەيدى ساراپشىلار. سول سەبەپتى كەي زاڭ شىعارۋشى تۇلعالار بۇل ەرەجەنى وزگەرتۋدىڭ قامىن جاساپ ءجۇر.
«ا ق ش- تا زاڭدى ەڭبەك دەمالىسىنىڭ بولماۋى قىزمەتكەردىڭ جۇمىس پەن جەكە ءومىر اراسىنداعى تەپە-تەڭدىكتى ساقتاۋىنا كەدەرگى كەلتىرەدى. ءبىز جۇرگىزگەن زەرتتەۋ كورسەتىپ وتىرعانداي، امەريكالىقتاردىڭ P- ءى ەڭبەك دەمالىسىنا شىقپايدى. مۇنداي ءۇزىلىستىڭ جەتىسپەۋشىلىگى ولاردىڭ سترەسكە تۇسۋىنە، كەي جاعدايدا پسيحيكالىق اۋىتقۋشىلىققا ۇشىراۋىنا سەبەپ بولۋى مۇمكىن» - لوتتە ۆان رەيسۆەيك، Resume.io كونتەنتىنىڭ جەتەكشىسى.
يراندىقتار جىلىنا 53 كۇن دەمالادى
ال از جۇمىس ىستەپ، كوپ دەمالاتىن حالىق - يراندىقتار. SEO اگەنتتىگى جۇرگىزگەن زەرتتەۋ قورىتىنىدىسىنا سايكەس يران ەڭ ۇزاق ەڭبەك دەمالىسى تاعايىندالاتىن ەلدەردىڭ ءتىزىمىن باستاپ تۇر. جەرگىلىكتى ەڭبەك كودەكسىنە سايكەس يراندىق قىزمەتكەرلەر جىلىنا 53 كۇن دەمالادى. 26 كۇن زاڭدى ۇزىلىسكە شىقسا، قالعان 27 كۇن مەملەكەتتىك مەرەكە ەسەبىنەن دەمالادى. ءارى ۇكىمەت بۇل كۇندەرى كومەك اقى تولەۋگە مىندەتتى.
مۇنان سوڭ سان- مارينو، يەمەن حالقى جىلىنا ءبىر مارتە ۇزاق مەرزىمدى دەمالىسقا شىعادى. ەڭ ۇزاق ەڭبەك دەمالىسى بەرىلەتىن ۇزدىك 10 ەلدىڭ ءتىزىمىن ازەربايجان قورىتىندىلايدى. بۇل ەلدە قىزمەتكەرلەر جىلىنا 42 كۇن ءۇزىلىس جاسايدى.
بىزدە قالاي؟
ەلىمىزدىڭ ەڭبەك كودەكسىنە سايكەس ءاربىر جۇمىس ىستەيتىن قىزمەتكەر جىلىنا ەڭ ۇزاق 24 كۇنتىزبەلىك ەڭبەك دەمالىسىنا شىعۋعا قۇقىلى. قاۋىپتى جاعدايلاردا جۇمىس ىستەيتىندەر مەن ءبىلىم بەرۋ جانە مەديتسينا سالاسى قىزمەتكەرلەرىنە زاڭمەن بەلگىلەنگەن قوسىمشا دەمالىس كۇندەرى قاراستىرىلعان.
24.kz