جاتتىعۋعا باراحولكادان جاياۋ كەلەتىن: فەدەراتسياسىنىڭ باسشىسى جادىرايەۆتىڭ ەل بىلمەيتىن قاسيەتتەرىن ايتتى

استانا. قازاقپارات - SMARTNEWS. KZ باسىلىمىنىڭ حابارلاۋىنشا، الماتى وبلىستىق كۇرەس فەدەراتسياسىنىڭ باسشىسى ءارى بۇرىنعى بالۋان دامير كۇزەمبايەۆ پاريج وليمپياداسىندا كۇمىس مەدال يەلەنگەن دەمەۋ جادىرايەۆتىڭ ەرلىگى جايلى ايتتى.

بۇل تۋرالى sportbugin.kz جازدى. فەدەراتسيا باسشىسىنىڭ پىكىرىنشە، دەمەۋ جىل وتكەن سايىن شەبەرگىلى ارتىپ، سالماق اۋىستىرعان سايىن ناتيجەسى جاقسارا تۇسكەن بىرەگەي بالۋان. 

«مەن كۇرەسىپ جۇرگەندە، دەمەۋ ەكەۋمىز ءبىر بولمەدە تۇراتىنبىز. ونىڭ ەڭبەكقورلىعى مەن ادامگەرشىلىگى جايلى تاڭدى تاڭعا ۇرىپ اڭگىمەلەۋگە بولادى. ءالى ەسىمدە، سپورت جانە تۋريزم اكادەمياسىندا بىرگە وقىدىق. سول كەزدە ول «باراحولكا» بازارىنىڭ ارتقى جاعىندا تۇراتىن. سول جەردەن اكادەمياعا جاياۋ كەلەدى. ساباقتان شىققان سوڭ «دوستىق» زالىنا جاتتىعۋعا بارادى دا، ءارى قاراي جاياۋ ۇيىنە قايتادى. ويلاڭىزشى، قانشاما شاقىرىمداردى باسىپ وتەدى؟! قيىندىقتان قاشپايتىن، وتە ەڭبەكقور جىگىت. ءاردايىم كومەكتەسۋگە دايىن تۇرادى، ادامگەرشىلىگىنە باس يەمىن. ال ونىڭ كىتاپقا دەگەن ماحابباتى بولەك اڭگىمە. جاتتىعۋ جيىنىنا كەلگەن سايىن وزىمەن ءبىر كىتاپ الىپ كەلەتىن دە، سونى جيىن بىتكەنشە وقىپ تاستايتىن. دەمەۋ سياقتى كىتاپ وقيتىن ادامدار دا از شىعار قازىر. دەمەۋدىڭ بۇل جەڭىسى ءبىزدى سەرپىلتىپ تاستادى. بۇل قازاقتىڭ كۇمىسى عوي. ونىڭ بارلىق ەڭبەگى وتەلىپ، قيىنشىلىقتارى ارتتا قالىپ، وليمپيادا تۇعىرىندا قاسقايىپ تۇرعانىنا قۋانىشتىمىن»، - دەيدى كۇزەمبايەۆ.

سونداي-اق وبلىستىق فەدەراتسيا باسشىسى دەمەۋ جادىرايەۆتىڭ پاريجدەگى بەلدەسۋلەرىنە باعا بەردى.

«دەمەۋ بۇرىن 66 كەلىدە كۇرەسەتىن. ريو وليمپياداسىنان كەيىن 71 كەلىگە اۋىسىپ، پاريجدەگى الەم چەمپيوناتىندا كۇمىس مەدال يەلەندى. توكيو وليمپياداسىنا 77 كەلى سالماقتا بارىپ، العاشقى وندىققا كىردى. ول وتكەن وليمپيادادا جامان كۇرەسكەن جوق. كىشىگىرىم قاتەلىك سالدارىنان جەڭىلدى. بىلتىرعى الەم چەمپيوناتىندا دا جۇلدە الاتىن جەردەن ءسۇرىندى. ال وسى جازعى ويىندارعا دەمەۋ بابىندا بارىپتى. ونىڭ كۇرەسى مۇلدە وزگەرگەن، جەتىلگەن. قاتتى قۋاندىق. دەمەۋ قاي سالماققا بارسا دا، ودان سايىن جەتىلە تۇسەتىن، شىڭدالا تۇسەتىن، ناتيجە كورسەتپەي كەتپەيتىن جىگىت. دەمەۋدىڭ كۇمىسى ءبىز ءۇشىن التىنمەن بىردەي»، - دەيدى ول.

قازىرگى تاڭدا الماتى وبلىستىق كۇرەس فەدەراتسياسى جەرگىلىكتى اتقارۋشى ورگاندارمەن بىرلەسىپ، وليمپيادانىڭ كۇمىس جۇلدەگەرىن قۇرمەتپەن قارسى الۋعا دايىندالىپ جاتىر.