جاتاقحانادا 16 جاستاعى قىز مەرت بولدى: جاڭا دەرەكتەر بەلگىلى بولدى
استانا. KAZINFORM - تالدىقورعاندا جاتاقحانادا كوز جۇمعان 16 جاستاعى زارينا بەرىكوۆانىڭ ءىسى بويىنشا تەرگەۋ مەرزىمى ۇزارتىلدى، - دەپ حابارلايدى «ينفورمبيۋرو» جاڭالىقتار قىزمەتى.
ستۋدەنتتىڭ جۇمباق ولىمىنە قاتىستى دەرەكتەر قوسىمشا تاعايىندالعان سوت-مەديتسينالىق ساراپتامانىڭ قورىتىندىسىنان كەيىن بەلگىلى بولماق. بۇل تۋرالى وبلىستىق پوليتسيا دەپارتامەنتىنىڭ وكىلدەرى مالىمدەدى.
سونداي-اق تەرگەۋشىلەر جاتاقحانانىڭ بەينەجازباسى جوعالىپ كەتتى دەگەن اقپاراتتى جوققا شىعاردى. ال مارقۇمنىڭ تەلەفونى مەن ۋاتساپ مەسسەندجەرىنە قاتىستى مالىمەتتەردى تەرگەۋ قۇپيالىعىنا بايلانىستى جاريالاۋعا قۇقىعىمىز جوق دەيدى ءتارتىپ ساقشىلارى.
ايتا كەتەيىك، زارينا بەرىكوۆا 28-اقپاندا يننوۆاتسيالىق كوللەدجدىڭ جاتاقحاناسىندا قايتىس بولعان ەدى. العاشىندا تاعايىندالعان مەملەكەتتىك مەديتسينالىق ساراپتامانىڭ ناتيجەسى بويىنشا بويجەتكەن ءدارى ءىشىپ، ۋلانىپ ولگەن. ءبىراق مەديتسينالىق پرەپاراتتىڭ مولشەرى بەلگىسىز. جانە بۇل قورىتىندىعا ستۋدەنتتىڭ جاقىندارى سەنبەيدى. سوندىقتان ولار ءىستىڭ جان-جاقتى ءارى ءادىل جۇرگىزىلۋىن تالاپ ەتىپ وتىر.
«كامەلەتكە تولماعان زارينا بەرىكوۆانىڭ جاتاقحانادا قايتىس بولۋ دەرەگى بويىنشا تالدىقورعان قالاسىنىڭ پوليتسيا باسقارماسىمەن ادام ءولىمى بابىمەن قىلمىستىق ءىس تەرگەلۋدە. قازىرگى تاڭدا جابىرلەنۋشىنىڭ زاڭدى وكىلىنىڭ وتىنىشىمەن قوسىمشا سوت دارىگەرلىك ساراپتاما تاعايىندالدى. ءىس بويىنشا ءتيىستى تەرگەۋ ارەكەتتەرى جۇرگىزىلگەننەن كەيىن زاڭدى پروتسەسسۋالدىق شەشىم قابىلدانادى»، - دەيدى جەتىسۋ وبلىستىق پوليتسيا دەپارتامەنتى تەرگەۋ باسقارماسىنىڭ باستىعى ارمان سۇلتان ۇلى.