كوپ دۇركىن رەكوردشى مۋحامەد كاحريمانوۆيچ گيننەستىڭ رەكوردتار كىتابىنىڭ كەزەكتى سەرتيفيكاتىنا يە بولدى. ول 50 دانا سۋسىن بانكاسىن ءبىر قولىمەن نەبارى 21,32 سەكۋندتا قيراتىپ، ەڭ جىلدام ۋاقىت كورسەتكىشىن تىركەگەن.
تەگى بوسنيالىق، قازىرگى تاڭدا گەرمانيانىڭ گامبۋرگ قالاسىندا تۇراتىن كاحريمانوۆيچ قول كۇشىن قولدانۋ ارقىلى جاسالاتىن جەتىستىكتەر ساناتىندا گيننەسستىڭ رەكوردتار كىتابىنداعى ەڭ كوپ اتاق العان قاتىسۋشىلاردىڭ ءبىرى سانالادى.
قازىرگى ۋاقىتتا ونىڭ ەسەبىندە رەسمي راستالىپ، تىركەلگەن 30 الەمدىك رەكورد بار. ال كاحريمانوۆيچتىڭ ءوزى الەۋمەتتىك جەلىدەگى پاراقشاسىندا جەتىستىكتەرىنىڭ ناقتى سانى 73 كە جەتكەنىن جازعان.
«بالعا قول» اتانعان شەبەر
كاحريمانوۆيچ جەكپە-جەك ونەرىمەن 40 جىلدان استام ۋاقىت بۇرىن اينالىسا باستاعان. ونداعان جىل بويى جاتتىعۋ ارقىلى ول بىلەگىنىڭ ەرەكشە كۇشىن جانە سوققى تەحنيكاسىن دامىتقان. وسى قابىلەتىنىڭ ارقاسىندا وعان «بالعا قول» (Mr. Hammerhand) دەگەن لاقاپ ات بەرىلگەن.
ول ءاردايىم تحەكۆوندوعا ەرەكشە كوڭىل ءبولىپ، وسى سپورت تۇرىنەن جوعارى ناتيجەلەرگە قول جەتكىزگەن. كاحريمانوۆيچ قارا بەلبەۋ يەگەرى اتانعان.
جەكپە-جەك شەبەرى العاشقى رەكوردىن 2011 -جىلى گامبۋرگتە ورناتقان. سول كەزدە ول ءبىر مينۋت ىشىندە ءبىر قولىمەن 66 شىنى بوتەلكەنى سىندىرعان.
قاتتى زاتتاردى قيراتىپ، رەكورد جاڭارتقان
كاحريمانوۆيچكە ەڭ ۇلكەن تانىمالدىلىق قاتتى زاتتاردى قيراتىپ، الەمدىك رەكوردتار ورناتۋىنىڭ ارقاسىندا كەلگەن. ونىڭ ەرەكشە جەتىستىكتەرىنىڭ قاتارىندا:
* 2022 -جىل: ءبىر مينۋتتا ءبىر قولىمەن 148 كوكوس جاڭعاعىن قيراتىپ، رەكورد ورناتتى؛
* 2022 -جىل: ءبىر مينۋتتا ءبىر قولىمەن 68 بەيسبول بيتاسىن قيراتتى؛
* 2022 -جىل: ەكىنشى قولىمەن شيكى جۇمىرتقانى بۇلدىرمەي ۇستاپ تۇرىپ، 63 اليۋميني بانكانى قيراتىپ شىقتى؛
* 2025 -جىل: كوزى بايلانعان كۇيدە ءبىر قولىمەن 48 كوكوستى قيراتىپ، رەكورد ورناتتى؛
* 2026 -جىل: كوزى بايلانعان كۇيدە 224 گرەك جاڭعاعىن قيراتىپ، جاڭا كورسەتكىش تىركەدى.
وسىلايشا، 66 جاستاعى مۋحامەد كاحريمانوۆيچ ەرەكشە كۇشىن سىنايتىن جاڭا رەكوردتارىمەن گيننەستىڭ رەكوردتار كىتابىنداعى جەتىستىكتەرىنىڭ سانىن تولىقتىرىپ كەلەدى.