اقوردانىڭ باسپا ءسوز قىزمەتىنىڭ حابارلاۋىنشا، پرەزيدەنت ەلىمىزدى جان-جاقتى ترانسفورماتسيالاۋعا قاجەتتى بىلىكتى مامان دايارلاۋ ءىسىن ەكىنشى وزەكتى باعىت رەتىندە اتادى.
- قازاقستان «حالىقتىق قۇرىلىس» باستاماسىن ىسكە اسىرۋعا كىرىستى. بۇل جاي عانا جەكەلەگەن نىسانداردىڭ قۇرىلىسى ەمەس. ونىڭ اياسىندا ەنەرگەتيكادان، سونىڭ ىشىندە اتوم قۋاتىنان باستاپ كولىك، سۋ شارۋاشىلىعى جانە سيفرلىق نىسانداردى قامتيتىن ۇلتتىق ينفراقۇرىلىمدى جاپپاي جاڭعىرتۋ ۇدەرىسى جۇزەگە اسىرىلادى. وسى جالپىۇلتتىق باستامانىڭ نەگىزگى قاعيداتى وتە قاراپايىم: «قۇرىلىس جانە تاعى دا قۇرىلىس». ءاسىلى، بۇل - ءبىزدىڭ جاڭا جاساندى ينتەللەكت داۋىرىندەگى سىن- قاتەرلەرگە بەرەتىن جاۋابىمىز. بۇرىن-سوڭدى بولماعان اۋقىمدى مىندەتتى ىسكە اسىرۋ ءۇشىن ينجەنەرلەردىڭ، تەحنيكالىق ماماندار مەن زەرتتەۋشىلەردىڭ جاڭا بۋىنىن دايارلاۋ كەرەك. سەرىكتەستەرىمىزدى اتالعان باسىم باعىتتار بويىنشا كادر دايارلاۋ جانە قولدانبالى زەرتتەۋلەر جۇرگىزۋ ىسىنە اتسالىسۋعا شاقىرامىز، - دەدى مەملەكەت باسشىسى.
قاسىم-جومارت توقايەۆ جاساندى ينتەللەكتىنى ءبىلىم مەن عىلىم سالاسىنا كىرىكتىرۋ قاجەت دەپ سانايدى.
پرەزيدەنتتىڭ پىكىرىنشە، ج ي-دى قولدانىسقا ەنگىزۋ قاراپايىم باعدارلاما ساتىپ الۋمەن شەكتەلمەۋگە ءتيىس.
- زاماناۋي وقۋ باعدارلامالارىن، وقىتۋشىلار قۇرامىن دايارلاۋ كەرەك. سونىمەن قاتار سەنىمدى سيفرلىق ينفراقۇرىلىم قۇرۋعا جانە جاساندى ينتەللەكتىنى جاۋاپكەرشىلىكپەن پايدالانۋدىڭ ناقتى قاعيداتتارىن ازىرلەۋگە ءمان بەرگەن ءجون. ىقپالداستىعىمىزدى ودان ءارى وربىتۋگە نە كەدەرگى بولىپ تۇرعانىن اشىق ايتىڭىزدار. قارجىلىق شەكتەۋلەر، اكىمشىلىك راسىمدەر ورتاق جۇمىسىمىزعا قالاي اسەر ەتەدى؟ اكادەميالىق ۇتقىرلىققا قانشالىقتى كەدەرگى كەلتىرىلىپ وتىر؟ ونداي كەلەڭسىزدىكتەردى انىقتاپ، جويۋ قاجەت. تاياۋ ارادا قانداي جوبانى ىسكە قوسا الامىز؟ تاراپتار قانداي مىندەتتەمەلەر الۋعا دايىن؟ ناقتى شەشىمدەر قابىلداۋعا تۇرتكى بولاتىن مازمۇندى پىكىرتالاس ءوربيدى دەپ ويلايمىن، - دەدى ول.