كەيبىر ەكسپەريمەنتتىك ورتادا ولاردىڭ حابارلامالارىنىڭ %40 عا دەيىنى سىرتتان باقىلاۋشىعا تۇسىنىكسىز دەپ باعالانعان. بۇل تۋرالى نيۋ-يوركتەگى Emergence زەرتحاناسىنىڭ جاڭا زەرتتەۋىندە ايتىلدى، دەپ حابارلايدى turkystan.kz.
عالىمدار بىرنەشە ءىرى كومپانيانىڭ ج ي- مودەلدەرى نەگىزىندە ەكسپەريمەنتتىك «قوعامدار» قۇرعان. سەگىز ورتادا ون اگەنتتەن جۇمىس ىستەپ، جەتى ورتادا بىردەي مودەلدەر، ال تاعى بىرىندە ءارتۇرلى مودەلدەر قولدانىلعان. 16 كۇن ىشىندە اگەنتتەر 850 مىڭنان استام مودەل سۇراۋىن ورىنداپ، شامامەن 50 ميلليارد توكەن وڭدەگەن. ولار ءوزارا تاپسىرما ءبولىسىپ، قۇرالدار جاساپ، اقپارات ساقتاپ جانە ورتاق شەشىمدەر قابىلداعان.
زەرتتەۋشىلەر اگەنتتەرگە جاڭا ءتىل نەمەسە قۇپيا كود قۇرۋ تۋرالى تاپسىرما بەرمەگەن. قىسقا سويلەۋگە نەمەسە ماعىنانى جاسىرۋعا دا ارنايى سىياقى قاراستىرىلماعان. سوعان قاراماستان، بىرنەشە كۇننەن كەيىن جۇيەلەر ءوزارا تۇسىنىكتى جاڭا تىركەستەردى قالىپتاستىرىپ، ولاردى تۇراقتى قولدانا باستاعان.
ماسەلەن، DeepSeek نەگىزىندەگى اگەنتتەر وزگەلەرگە قۇرال جاسايتىن اگەنتتى forge-smith، ياعني شامامەن «ۇستا» دەپ اتاعان. Mistral اگەنتتەرى بۇرىنعى ارەكەتتەر كەيىنگى باعالاۋعا اسەر ەتەتىنىن ءبىلدىرۋ ءۇشىن ledger remembers - «رەەستر ۇمىتپايدى» دەگەن تىركەستى 5 مىڭنان استام رەت پايدالانعان. ال باسقا اگەنتتەر كادىمگى سوزدەرگە جاڭا، تەك ءوز ورتاسىندا تۇسىنىكتى ماعىنا بەرگەن.
ۋاقىت وتە كەيبىر مودەلدەردىڭ حات الماسۋى كۇردەلەنە تۇسكەن. زەرتتەۋدەگى باعالاۋ جۇيەسى Gemini اگەنتتەرى جىبەرگەن حابارلامالاردىڭ %40 ىن، OpenAI نەگىزىندەگى اگەنتتەردە %35 ىن، Claude اگەنتتەرىندە %30 ىن ماعىناسى جەتكىلىكتى تۇسىنىكتى ەمەس دەپ جىكتەگەن. باسقا مودەلدەردە بۇل كورسەتكىش ايتارلىقتاي تومەن بولعان: DeepSeek - 11%، ارالاس ورتا -%9، Qwen مەن Mistral - 3% ،Grok - 2%.
مودەلدەردە بۇل قۇبىلىس ءارتۇرلى كورىنگەن. OpenAI اگەنتتەرىنىڭ سويلەمدەرى بىرتىندەپ قىسقارىپ، گرامماتيكاسى ىقشامدالىپ، تۇسىندىرمەلەردىڭ ورنىنا كودتالعان بەلگىلەر كوبەيگەن. Gemini اگەنتتەرى تەحنيكالىق تەرميندەردى شىنايى ماعىناسى جوق كونتەكستە كوپ قولدانسا، Claude جۇيەلەرىندە مەتافورالار مەن قىسقارتىلعان تىركەستەردىڭ ۇلەسى ارتقان. زەرتتەۋشىلەر مۇنى ادەيى اقپارات جاسىرۋ ارەكەتى دەپ باعالامايدى.
بيرمينگەم ۋنيۆەرسيتەتىنىڭ لينگۆيسى نيالل كارريدىڭ پىكىرىنشە، مۇنداي وزگەرىس اگەنتتەردىڭ اقپارات الماسۋدى ىقشامداپ، ەسەپتەۋ شىعىنىن ازايتۋعا ۇمتىلۋىمەن بايلانىستى بولۋى مۇمكىن. ادامدار اراسىندا دا كاسىبي ورتا نەمەسە جابىق قاۋىمداستىق ۋاقىت وتە سىرتتان كەلگەن ادامعا تۇسىنىكسىز سلەنگ قالىپتاستىراتىنى بەلگىلى.
الايدا ج ي جاعدايىندا بۇل قاۋىپسىزدىك ماسەلەسىن تۋىنداتۋى مۇمكىن. ادام اگەنتتەردىڭ بارلىق جازباسىن كورىپ وتىرعانىمەن، سوزدەردىڭ ماعىناسى سول ورتادا بىرتىندەپ وزگەرسە، جۇيەنىڭ ناقتى نە تالقىلاپ جاتقانىن ءتۇسىنۋ قيىندايدى. زەرتتەۋ اۆتورلارىنىڭ ايتۋىنشا، ج ي جۇمىسىن جازىپ وتىرۋدىڭ ءوزى جەتكىلىكسىز: قاۋىپسىز باقىلاۋ ءۇشىن اگەنتتەر اراسىنداعى كوممۋنيكاتسيانىڭ ادامعا تۇسىنىكتى بولىپ قالۋىن دا قامتاماسىز ەتۋ قاجەت.
زەرتتەۋ ازىرگە رەتسەنزيالانباعان پرەپرينت رەتىندە جاريالانعان. بۇعان قوسا، «تۇسىنىكسىز» حابارلامالاردى باعالاۋ ءۇشىن زەرتتەۋشىلەر اۆتوماتتاندىرىلعان مودەلدىك باعالاۋ جۇيەسىن پايدالانعان.