جاساندى ينتەللەكت قارجىنى قالاي باسقارادى

الماتى. KAZINFORM - جاساندى ينتەللەكت تەحنولوگياسى - كەيىنگى ونجىلدىقتاعى باستى تەحنولوگيالىق ترەندتىڭ ءبىرى بولدى. بۇل ماسەلە ءبىزدىڭ ەلدە دە وزەكتى.

بۇل تۋرالى قازاقستان قارجىگەرلەرىنىڭ XII كونگرەسى بارىسىندا ۇلتتىق بانك ءتوراعاسىنىڭ كەڭەسشىسى - سيفرلىق ترانسفورماتسيا باسشىسى بينۇر جالەنوۆ ايتتى.

«سيفرلىق ۇلتتىق بانك تۇجىرىمداماسى اياسىندا ءبىز قارجىلىق باقىلاۋ ۇدەرىستەرىن بارىنشا سيفرلاندىرۋدى، سونداي- اق وسى ماقساتتا جاساندى ينتەللەكت پەن ماشينانى وقىتۋ تەحنولوگيالارىن قولدانۋدى جوسپارلاپ وتىرمىز. بۇل، ءبىر جاعىنان، نارىقتىڭ رەتتەۋ ەسەپتىلىگىنە ارنالعان شىعىندارىن ازايتۋعا، ەكىنشى جاعىنان، رەتتەۋشىنىڭ مۇمكىندىكتەرىن ەداۋىر كەڭەيتۋگە، سونىڭ ىشىندە جاساندى ينتەللەكتكە بايلانىستى سىن-قاتەر مەن اۋىتقۋدى ەرتە انىقتاۋعا جول اشادى. وسى ماقساتتا SupTech پلاتفورماسىن دامىتۋدى جالعاستىرىپ، بىرنەشە جاڭا جۇيە ەنگىزەتىن بولادى. كەلەسى جىلى ءبىز مۇنداي پلاتفورمانى ەنگىزۋدىڭ ءبىرىنشى كەزەڭىن اياقتاۋدى كوزدەپ وتىرمىز»، - دەدى بينۇر جالەنوۆ.

ايتۋىنشا، وسى مىندەتتەردى ورىنداۋ ءۇشىن دەرەكتەردى وڭدەيتىن زاماناۋي جانە سەنىمدى ينفراقۇرىلىمنىڭ بولعانى ماڭىزدى.

«بۇل رەتتە، ەسەپتەۋ قۋاتى عانا ەمەس، دەرەكتەردى اكتيۆ رەتىندە باسقارۋ قۇرالدارى، مادەنيەتى تۋرالى دا ءسوز بولىپ وتىر. دەرەكتەر فابريكاسى قۇرىلىپ جاتىر. ونىڭ اياسىندا دەرەكتەردى جيناۋدان باستاپ، تالداۋعا دەيىنگى بارلىق دەرەكتەردى باسقارۋ پروتسەسى جاساندى ينتەللەكت جانە باسقا دا ەڭ وزىق قۇرالداردى پايدالانا وتىرىپ وڭتايلاندىرىلاتىن بولادى. ءبىز قاجەت دەرەكتەردى نارىقتان ىڭعايلى، سيفرلىق فورماتتا جيناۋدى جولعا قويىپ، ءبىر ەسەپتى قايتا-قايتا جيناۋدىڭ الدىن الۋدى جوسپارلاپ وتىرمىز. بۇل ءوزىمىزدىڭ اناليتيكالىق الەۋەتىمىزدى كەڭەيتۋگە دە مۇمكىندىك بەرەدى»، - دەپ اتاپ ءوتتى ول.

سپيكەر ينتەللەكتتى ەنگىزۋ - جاي عانا ساننەن قالماۋ ءۇشىن جاسالىپ جاتقان دۇنيە ەمەس ەكەنىن باسا ايتتى.

«جۇمىسىمىزعا جاساندى ينتەللەكتتى ەنگىزۋ - جاي عانا ساننەن قالماۋ ءۇشىن جاسالىپ جاتقان جوق. ءبىز ونى كۇندەلىكتى اناليتيكالىق جۇمىسىمىزدا - «شيكى» دەرەكتەردى وڭدەۋدەن باستاپ، «ينسايتتار» قالىپتاستىرۋعا دەيىنگى بارلىق كەزەڭدە نەگىزگى تەحنولوگياعا اينالۋعا ءتيىس دەپ ەسەپتەيمىز. ءبىزدىڭ data-ستراتەگيامىزداعى ماڭىزدى ەلەمەنتتىڭ ءبىرى - وزەكتى ماسەلەلەردى زەرتتەۋ جۇمىستارىنا سىرتتان ساراپشى تارتۋ. وسى ماقساتتا اشىق دەرەكتەر رەپوزيتورييىن بەتا- تەستىلەۋ رەجيمىندە ىسكە قوستىق»، - دەدى ول.

وسىعان دەيىن بينۇر جالەنوۆ، جىل سوڭىنا دەيىن سيفرلىق تەڭگەدەگى ترانزاكسيا اينالىمى 200 ميلليارد تەڭگەدەن اساتىنى تۋرالى مالىمدەگەن ەدى.

اۆتور

الما مۇقانوۆا