جاساندى ينتەللەكت دۋبلياج سالاسىنا قاۋىپ ءتوندىرىپ تۇر

استانا. KAZINFORM - فرانسيادا تانىمال اكتەر، بەن اففلەك پەن حواكين فەنيكستىڭ داۋىسىن دىبىستاعان بوريس رەلينگەر دۋبلياج سالاسىن جاساندى ينتەللەكتەن قورعاۋعا شاقىرىپ وتىر، دەپ حابارلايدى Reuters اگەنتتىگى.

ونىڭ ايتۋىنشا، بۇل سالادا جۇزدەگەن كاسىبي مامان ەڭبەك ەتىپ جاتقانىمەن، ج ي تەحنولوگيالارى ولاردىڭ جۇمىسىنا ناقتى ءقاۋىپ توندىرۋدە.

«مەن ءوز داۋىسىمدى ج ي ءالى الماستىرماعانىنا قاراماستان، قاۋىپ بارىن سەزەمىن»، - دەدى اكتەر Reuters-كە بەرگەن سۇحباتىندا.

ول ادامدار جاساعان دۋبلياجدى قورعاۋعا باعىتتالعان فرانسۋز باستاماسى - TouchePasMaVF قوزعالىسىنا قاتىسىپ ءجۇر.

اكتەردىڭ ايتۋىنشا، دۋبلياج - تەك ءبىر داۋىستىڭ جۇمىسى ەمەس، بۇل سالادا اكتەرلەر، اۋدارماشىلار، رەجيسسەرلەر، ديالوگ بەيىمدەۋشىلەرى مەن دىبىس ينجەنەرلەرى ەڭبەك ەتەدى. ولاردىڭ ءبارى كورەرمەنگە ەكرانداعى اكتەر ءوز تىلىندە سويلەپ تۇرعانداي اسەر قالدىرۋ ءۇشىن جۇمىس ىستەيدى.

Netflix سەكىلدى ستريمينگتىك پلاتفورمالار «كالمار ويىنى» مەن «ليۋپەن» سياقتى حيت تۋىندىلاردى ناسيحاتتاۋ ءۇشىن دۋبلياجدى كەڭىنەن قولدانۋدا. بۇل - سالانىڭ دامۋىنا ۇلكەن سەرپىن بەرگەن.

GWI زەرتتەۋ كومپانياسىنىڭ دەرەگىنشە، گەرمانيا، فرانسيا، يتاليا جانە ۇلى بريتانياداعى كورەرمەندەردىڭ 43 پايىزى دۋبلياجدى سۋبتيترلەرگە قاراعاندا ارتىق كورەدى.

Business Research Insights مالىمەتى بويىنشا، 2025 -جىلى دۋبلياج نارىعىنىڭ كولەمى 4,3 ميلليارد دوللارعا جەتەدى، ال 2033 -جىلعا قاراي 7,6 ميلليارد دوللارعا دەيىن ۇلعايۋى مۇمكىن.

بۇل ءوسىم جاڭا تەحنولوگيالىق شەشىمدەرگە دەگەن قىزىعۋشىلىقتى ارتتىرا ءتۇستى. دەگەنمەن، جاساندى ينتەللەكت كومەگىمەن جاسالعان داۋىستار بارعان سايىن شىنايى ءارى قولجەتىمدى بولا باستاعان كەزدە، ەۋروپاداعى دۋبلياج اكتەرلەرىنىڭ قاۋىمداستىقتارى ەۋرووداقتان سالانى قورعاۋعا باعىتتالعان قاتاڭ رەتتەۋلەر ەنگىزۋدى تالاپ ەتىپ وتىر. ولار دۋبلياج ساپاسى مەن اۆتورلىق قۇقىقتى قورعاۋمەن قاتار، اكتەرلەردىڭ داۋىستىق ارحيۆتەرىنىڭ رۇقساتسىز پايدالانىلۋىنا دا الاڭداۋشىلىق بىلدىرۋدە.

كينويندۋستريادا تەحنولوگيالارعا قاتىستى الاڭداۋشىلىق بۇرىننان بار. گولليۆۋدتا جاساندى ينتەللەكت 2023 -جىلى نەگىزگى تاقىرىپتاردىڭ بىرىنە اينالىپ، وسىعان بايلانىستى بولعان ەرەۋىلدەردەن كەيىن تەحنولوگيانى قولدانۋعا شەكتەۋ ەنگىزىلگەن بولاتىن.

ايتا كەتەيىك، ا ق ش پەن قىتاي جاساندى ينتەللەكت سالاسىندا كوشباسشى اتاندى.